افتكر مايكل جاكسون.. رسالة مؤثرة من تامر حسني لـ"رامي جمال"

كتبت- ياسمين الشرقاوي:

آزر الفنان تامر حسني صديقه الفنان رامي جمال، بعد إعلانه أمس إصابته بمرض البهاق، عبر حساباته الشخصية على مواقع التواصل الاجتماعي.

وشارك "حسني" صورة تجمعه بـ"رامي"، وعلق عليها قائلًا: "إلى الفنان الكبير والصديق الحقيقي والمحترم رامي جمال يا حبيبي إنت فنان كبير ومحبوب وليك قيمتك وكل الناس بتحبك ومفيش حاجة هتعطلك عن نجاحك، وتعبك دا لاهو مؤذي ولا مُعدي وكل الناس جواها تعب منه اللي ظاهر ومنه اللي مش ظاهر".

وأضاف: "حتى لو كان تعب نفسي أو مادي كل شخص جواه وجع من حاجة معينة المهم إننا نبص و نتعلم من اللي ظروفهم أصعب مننا، ورغم كدا عندهم صبر وبينجحوا في الاختبار وبيقولوا الحمد لله ومكملين وعندهم إرادة وبينجحوا أكتر من الأول".

وتابع: "لازم تكمل نجاح يا رامي وشيل أي هلاوس من دماغك وإوعى تخبي نفسك.. اللي بيحبك بيحبك لشخصك وفنك صدقني دي حاجة عادية يا رامي والله ملهاش أي تأثير لا عليك ولا على جمهورك.. بالعكس بقى إنت أكيد شايف الناس كلها طيبين إزاي ونفسهم يفرحوك وبعدين افتكر إن مايكل چاكسون جاله نفس اللي جالك وبقى أسطورة مبتتكررش خالص وانت فنان وعارف، أنا واثق إنك مؤمن وبتحمد ربنا وهتقوم وهتكمل وهفكرك قدام كل الناس اللي شايفة كلامي إنك هتنجح أكتر وأكتر وربنا هيكرمك أجمل كرم وهتشوف قريب، بحبك يا رامي".

وكشف المطرب الشاب رامي جمال عن إصابته بمرض البهاق، عقب ظهور بقع بيضاء اللون في مناطق بجسده، قائلًا إنه ذهب لعدد كبير من الأطباء إلا أنهم لم يجدوا حلولًا لها.