"طلع مش مسعور".. رحمة حسن تكشف تطورات جديدة بعد تعرضها لعضة كلب

كتبت- بهيرة فودة:

كشفت الفنانة رحمة حسن عن تطورات جديدة، بعد أن تعرضت منذ أيام لعضة كلب.

ونشرت رحمة صورة لتطعيمات الكلب الذي عضها، عبر حسابها الرسمي بموقع "إنستجرام"، وعلقت: "دي صور لتطعيمات الكلب، الحمد لله طلع مش مسعور".

وكانت الفنانة الشابة رحمة حسن كشفت عن تعرضها لحادث بعد قيام كلب ضخم بالهجوم عليها وعضها، وذلك عبر حسابها الخاص على إنستجرام، وذلك أمس الثلاثاء.

أوضحت رحمة: "امبارح الساعة ١١ بليل كنت نازلة أجيب حاجة من السوبر ماركت جمب البيت، كنت ماشية على الرصيف وكان في عربية بتركن جمبي عادي، فجأة الباب اتفتح ولقيت كلب جيرمن شيبرد بيهجم عليه بكل قوته".

وتابعت: "طبعا حاولت أجري لكن للأسف الكلب كان قوي وشرس ووقعني على الأرض، حاولت أقوم وأجري وصاحبته حاولت تشده، بس فك الليش بتاعه وعضني عضة كبيرة وغويطة بنابه في منطقة حساسة".

وأضافت: "صاحبة الكلب كتر خيرها أخذتني فورا على مستشفى إمبابة، ادوني حقنة تطعيم الكلب ولسه فاضل لي ٤ هاخدهم خلال شهر، بس المشكلة أن من امبارح الجرح بينزف دم كتير، وأنا طبعا خايفة ومصدومة وتعبانة وعندي تروما من امبارح واللي واجعني أكتر أني مَش عارفة أتصرف إزاي، خصوصا أني أكيد مَش عايزة الكلب يتأذي، بس كمان مَش عايزة أي إنسان كمان يتأذي ويتعض ويتبهدل في الشارع زيي".

وأكدت رحمة حسن أنها اعتادت رؤية صاحبة الكلب وهي تنزه، وكنت تتجنبه، قائلة: "أنا كنت بشوف الكلب ده دائما مع صاحبته بتمشي بيه في الشارع جمب البيت عندي، وعشان شكله شرس كنت بمشي بعيد عنه لما بشوفه، امبارح صاحبة الكلب قالت لي متخافيش هو عض ولادي قبل كدا وتمام محصلش حاجة".

واستكملت: "طبعا أنا اتصدمت لما عرفت أنها مَش أول مرة الكلب يعض حد، ومع ذلك هي سايباه عادي في الشارع من غير كمامة أو حد قوي يمسكه، بجد حرام عليكم، الكلب لما بيكون حجمه كبير وشرس بيعتبر سلاح، وصاحبه مسئول مسؤلية كاملة عنه ويحاسب علي إهمال مسؤليته، خصوصا لو إهماله تسبب لشخص تاني في أذى بدني يحتاج أكتر من ٢١ يوم علاج، وأذى نفسي ماعرفش هايحتاج قد إيه عشان يخف".

واستطردت: "أنا كنت بحب أنزل أحط أكل ومياه للكلاب والقطط تحت البيت، دلوقتي أنا حقيقي مرعوبة أقرب منهم وخايفة جدا".

واختتمت قائلة: "أنا أسفة طولت عليكم بس أنا بجد مَش عارفة المفروض أعمل إيه عشان محدش تاني يتأذي".

View this post on Instagram

A post shared by Ru (@realrahmahassan)