المجند أيمن قنديل: "كنت واثق من تلبية الرئيس لمطالبي"

كتب- محمد خميس:

علق أيمن قنديل، المجند الذي قابله الرئيس بالعلمين، على تسلمه هدية الرئيس وهي عقد ملكية مكتبة جديدة، قائلاً: "كنت متأكد بنسبة مليون في الميه أن الرئيس يحقق لي مطلبي"، مضيفًا: "لو قعدت من هنا للسنة الجاية مش هعرف أوصف مشاعري أني سقت العجلة بجوار الرئيس السيسي".

وأضاف "قنديل" في مداخلة هاتفية لبرنامج "كلمة أخيرة" على فضائية "ON E" اليوم السبت: "في بداية اللقاء اتخضيت ومكنتش حاسس بنفسي لما الرئيس قالي سلام عليكم، الكرسي بتاع العجلة بتاعك واطي ليه كده ؟ فعليناه وقالي تعالى هات عجلتك وسابقني وسألني عن إسمي قلتله " أيمن " وقالي سابقني ولما اتكلم معايا قالي أنت مكسوف مني ؟ أنا زي والدك ثلاث مرات فهديت وأخدت نفس وبدأت اتكلم معاه ببساطة".

وتابع: "الخضة في الأول ده طبيعي لأني بقابل رئيس الجمهورية وماكنتش أحلم بحاجة زي دي، ولما قالي نفسك في إيه ؟ فضلت للحظات مش عارف أققول إيه لحد ما حكيت له عن مشروعي الصغير وإزاي نفسي أكبره وسألني في مكان معين كويس ؟ قلتله فيه مكان كويس وشغال .. والحمد لله".

وأردف "قنديل": "أول تليفون عملته بعد لقاء الرئيس كلمت والدي وحكتله ومكنتش عارف أقوله إيه ؟ مكنش هيصدقني بس أنا كلمته في نص الليل وده وقت متأخر عندنا في منطقة العامرية في الإسكندرية وسألني فيه حاجة يعني؟ قولتله لا تمام الرئيس أتكلم معايا وسألني محتاج حاجة ؟ وقلتله الرئيس بيسلم عليكم وفعلاً الرئيس بعتله السلام.