• علاء مرسي يتعرض لسرقة بالإكراه ويسرا اللوزي تريد أن تتعلم "الرقص"..تصريحات نجوم "الفن×أسبوع"

    03:18 م الجمعة 11 يناير 2019

    إعداد- منى الموجي:

    تتنافس البرامج التليفزيونية كل أسبوع على استضافة أشهر نجوم ونجمات الفن، للحديث عن أمور شخصية وفنية، تضمن الخروج بتصريحات جريئة، تحقق أعلى نسب مشاهدة. وفي السطور التالية، يستعرض "مصراوي" أبرز 7 تصريحات لأهل الفن في البرامج الفنية خلال الأسبوع الماضي "رانيا يوسف تكشف كيف تعرف المرأة بخيانة زوجها، ويسرا اللوزي ترغب في تعلم رقص المهرجانات والرقص الشرقي، وعلاء مرسي يحكي تفاصيل تعرضه لسرقة بالإكراه،..".

    رانيا يوسف

    حلت الفنانة رانيا يوسف ضيفة على برنامج "أنا وبنتي"، الذي يقدمه الفنان شريف منير وابنته اسما، على قناة ON E، وتطرقت رانيا للكثير من الموضوعات الحياتية والفنية، وأكدت أن المرأة بإمكانها أن تكتشف أن زوجها يخونها، موضحة " عشان لما دماغ الراجل بتشتغل مع واحدة بتفصل من التانية، لما بتركز إنك معجب بواحدة بتنسى شريكة حياتك وتفاصيلها، لأنك مهتم بالناحية التانية، وبتلاقي تون صوتك اتغير، نظرة عينك، لغة جسمك، الجنتلة بتبقى زيادة شوية حبتين".

    يسرا اللوزي

    وأكدت الفنانة يسرا اللوزي أثناء استضافتها في حلقة جديدة من حلقات "حفلة 11"، الذي تقدمه المذيعة سمر يسري على قناة ON E، إنها تحب سماع الغناء الشعبي وأغاني المهرجانات، لكنها لا تحفظ منها شيء.

    وتابعت "لما ببقى في فرح ولو في مكان زحمة بحبها، ونفسي اتعلم أرقص مهرجانات، عايزة حد يعلمني مبعرفش أرقص بلدي خالص خشبة عشان الباليه، عايزة اتعلم الرقص الشرقي بتاع زمان زي سامية جمال، ونفسي ألعب دور يكون فيه رقص مهرجانات".

    علاء مرسي

    واستضاف الفنان أشرف عبدالباقي، في حلقة جديدة من برنامج "قهوة أشرف" المعروض على قناة الحياة، الفنان علاء مرسي، والذي حكى عن موقف تعرض فيه لسرقة بالإكراه.

    وقال علاء "كنت ماشي في الشارع بمحافظة الشرقية بعد ما عملت الاختبارات للشباب، وبدأت أجهز معاهم عرض يعملوه، وأنا خارج كان معايا مصور لقيت واحد داخلي شباك العربية بالمطوة وبيقولي (إثبت ياه)، قلتله عايز إيه عايز الكاميرا، عايز العربية خدها بس تعالى نتكلم انت بتعمل معايا كده ليه، قالي ايه ده دا انت الممثل انت بتعمل ايه هنا، قلتله انا بعمل كذا كذا للشباب بدل ما تقعدوا وتقولوا فين الفرصة أنا جتلك بقولك يالا اشتغل هظبطلك الدنيا، قالي أنا شاعر".

    وتابع "قعد يقولي كلام كتير شعر، حاجات بتاعته وحاجات هو غاششها من حد، قلتله تدخل معايا الورشة قالي أنا حبيتك بس اديني الموبايل، كان معايا موبايل صغير ادتهوله وخد رقمي، وحضر معايا الورشة والتزم بدأت العيال تقولي موبايلاتنا بتتسرق يا أستاذ، كلمته قلتله رجع الموبايلات كان باعهم بـ400 جنيه قلتله خدهم ورجع الموبايلات".

    محمود عبدالغني

    وقال الفنان محمود عبدالمغني الذي حل ضيفًا على برنامج "قهوة أشرف"، إنه كان يعمل في ورش طوب، حيث كان يقطن في منطقة الوراق، التي بها مكان معروف باسم أرض الورش، وتابع "كان بيبقي فيه صف طوب طويل، أنا كانت وظيفتي الف الطوبة في الشمس عشان تنشف، وكنت باخد 65 قرش في اليوم".

    نرمين الفقي

    استضافت المذيعة دعاء صلاح في برنامجها "حكايتِك"، المعروض على قناة النهار، الفنانة نرمين الفقي، والتي تحدثت عن الارتباط، والعلاقة بين الرجل والمرأة، قائلة "لازم أكون بالنسباله مهمة وهو هيكون بالنسبالي أهم حاجة في الدنيا، لو وجد هذا الرجل بالتالي هيكون أهم حاجة في حياتي، لازم الست تحس إنها أهم حاجة عند الراجل ده، لكن جزئية مين أقل ومين أقوى ومين أعلى هي شعرة وبتبقى مهمة جدًا".

    وردًا على كيف سيكون تصرفها، إذا تعرضت للضرب من الرجل الذي سترتبط به، قالت "ده بقى نوع من الثقافة، كنت بتفرج على برنامج من كام يوم، لقيت راجل بيقول آه أنا مديت إيدي على مراتي، بيقول إنه ضرب عادي. يعني ايه ضرب عادي وضرب مش عادي، الست مش عايزة أقول وردة مينفعش تتخدش، بس في الآخر طلعت نزلت أيًا كان نجاحها فهي كائن ضعيف".

    كارمن سليمان

    كشفت الفنانة كارمن سليمان، خلال استضافتها في برنامج "شريط كوكتيل"، الذي يقدمه الفنان هشام عباس، على قناة الحياة، أنها تعرفت على زوجها الملحن مصطفى جاد بالصدفة.

    وقالت "أنا ومصطفى فعلا اتقابلنا صدفة، كنت رايحة أقابل الشاعر محمد الرفاعي وهو مش قايلي إن فيه حد معاه، رحنا لقيته بيعرفني على مصطفى. ومصطفى بيقولي كنتي رخمة أوي اليوم ده، هو أعجب بيا من أول ما دخلت".

    هاني رمزي

    وحل الفنان هاني رمزي ضيفًا على برنامج "8 الصبح"، المعروض على قناة DMC، وتقدمه المذيعة رحمة خالد، وقال "اتولدت في الإسكندرية أمي من هناك، لكن عائلة أبويا في الصعيد من مدينة اسمها بني مزار في المنيا، ودرست لحد الثانوية العامة وبعد كده جيت جامعة هنا في القاهرة".

    وأضاف "درست في كلية التجارة ومدخلتش كلية حقوق لإني اتعقدت العائلة كلها محامين، كل كلامهم القضايا والمشاكل والصراعات الموجودة عند الناس، وأنا كان نفسي أبقى ممثل من وأنا طفل، رغم ان أمنية أبويا إني ابقى محامي زيه، لكن فضّلت إن هوايتي التمثيل تبقى مهنتي".

     

    إعلان

    إعلان

    إعلان