هيدي كرم تعلق على قتل قرش السائح الروسي: "إحنا الجاني الحقيقي"

كتب- مصراوي:

علقت الفنانة هيدي كرم على اصطياد القرش الذي هاجم السائح الروسي وتسبب في قتله، واستنكرت طريقة تعامل صائدي القرش، كما لو كان مجرم يقومون بضربه ومحاسبته.

وقالت في فيديو عبر صفحتها على موقع التواصل الإجتماعي انستجرام: "كلنا عيشنا لحظات مرعبة جدا ولحظات مؤلمة جدا بسبب فيديو السائج الروسي اللي تم الهجوم عليه من سمكة القرش وقتله .. والله يكون في عون أهله وأصدقائه والناس اللي شافت وعاشت اللحظة دي بكل تفاصيلها المؤلمة.. إحنا من مجرد فيديو شوفناه على السوشيال ميديا قلبنا وجعنا واتقطعنا كلنا من جوانا .. أنا اللي شوفته إن هما اصطادوا القرش وموتوه وضربوه بمطرقة على دماغه وبيدوله بوكس وبينتقموا منه إنتقام شديد جدا كأنه قاتل مجرم".

وأضافت: "بس مش الحل إننا نقتل قرش على فكرة لإن أنا لقيت صحابي على السوشيال ميديا بيكتبوا يالا مات يالا يتحرق زي ما يكون يعني مجرم .. لا هو مش مجرم على فكرة هو سمكة جعانة بتدور على أكل في منطقتها وبحرها وأرضها .. أكيد في حاجة حصلت في حياة القرش ده خليته يطلع على المياه الضحلة يدور على أكل هو مش غاوي لحم البني آدم هو بيهاجم البني آدم لأسباب معينة خصوصا في البحر الأحمر القروش مبتطلعش على الشواطئ فلازم نعرف إيه اللي خلاه يطلع على الشاطئ .. كان لازم نصطاده ونرجعه مكانه بس مكنش المفروض نعمل فيه كده".

وعن أسباب ذلك من وجهة نظرها قالت: "فيه سببين خلوا سلوك القرش في الكام سنة الأخيرة يتغير والله أعلم هو أي سبب، بسبب البني آدم اللي بوظ البيئة وخلى القرش يطلع من مكانه .. أول رواية أن قبل العيد بتتنقل الأضحية في مراكب ولو في أي حيوان مات بيترمي في البحر وده بيعمل حالة هيجان للقروش وتخليهم يطلعوا عالشط والله أعلم ده اللي حصل ولا لا.. والرواية التانية اللي أنا برجحها بقى اللي هي منطقية أكتر موضوع الصيد اللي مبقاش محسوب وبقى غير قانوني وبكميات كبيرة جدا غير مسموح بيها وبطرق غير صحيحة".

واستكملت: "فإنت جردت البحر من السمك خليته زي أرض صحراوية .. فالقرش جاع انت خدت أكله فطلع يدور على أكل لأنك ماشي تصطاد كده وخلاص بدون أي تحكم فإحنا السبب إحنا اللي عملنا كده فلازم نبص لنفسنا الأول إحنا الجاني الحقيقي".

ولقي سائح روسي مصرعه أمس الخميس متأثرًا بإصابته عقب مهاجمة سمكة قرش من نوع النمر له في شاطئ بالقرب من مدينة الغردقة بالبحر الأحمر.

في السياق أعلنت وزارة البيئة المصرية تفاصيل الواقعة واصطياد سمكة القرش التي تبين أنه من نوع النمر، وذلك عقب إجراء مسح شامل للمسطح المائي في موقع الحادث.