إعلان

مخرجة "أعوان الخير": أعيش بالخارج وكل أفلامي بالمصري وفخورة بتكريمي في الإسكندرية (خاص)

04:36 م الجمعة 24 فبراير 2023

كتبت- منى الموجي:

أكدت المخرج الشابة فرح محمد، أنها تشعر بالفخر بعد فوز فيلمها الوثائقي "أعوان الخير" بجائزة هيباتيا الفضية لجنة التحكيم الخاصة، في حفل ختام الدورة التاسعة من مهرجان الإسكندرية للفيلم القصير، والذي أقيمت فعالياته في الفترة من 16 إلى 22 فبراير الجاري.

وفي تصريحات خاصة لـ"مصراوي"، قالت "فخر كبير إني بتكرم في بلدي، أنا مش عايشة في مصر لكن لما بتكرم فيها بيبقى الموضوع له روح مختلفة وفخورة، دي أول مرة أجي الإسكندرية، حاجة جديدة".

وأشارت فرح إلى أنها ولدت وتعيش حتى الآن في قطر، لكن كل أفلامها بالمصري وفي مصر، مضيفة "اشتغلت على أفلام كتير جدا قبل أعوان الخير، بس كنت ببقى جزء منها، مبيكونش الفيلم بتاعي، (أعوان الخير) فكرته وأخرجته وصورته وأنتجته وعملت المونتاج، بالنسبة لي له مكان في قلبي وبحبه لأنه فكرتي وأنا اللي كنت عايزة انفذه بطريقتي وبكل حب بصرف عليه، وبشتغل عليه جامد جدا".

وحكت أن الفكرة جاءتها، بعد أن اعتادت زيارة دار "أعوان الخير" في كل زيارة لها لـ مصر، موضحة "هو دار بزوره طول عمري كل ما بنزل مصر، بيستضيف نساء تعاني من مرض السرطان من مصر ودول عربية معندهمش إمكانيات يتعالجوا، وبيكون سكن وبيقعدوا هناك وياكلوا ويشربوا ويتعالجوا، بحس ان اللي بيزورهم بيشعر بشفقة عليهم وفيه حزن، لكن هما نفسهم معندهمش الروح دي، بالعكس كلهم حياة وحب وقوة، وكنت عايزة أبين الفيلم بالضوء ده، آه فيه محنة ومرض بس فيه حياة".

وعن خطوتها المُقبلة، قالت "الخطوة اللي جاية من كتر ما سمعت وجاتلي طاقة إيجابية حاسة اني عايزة أكمل وأعمل الأفلام اللي بحبها، اكتر أفلام بحس بتنجح معايا، ولما بنزل مصر بحس ان كل حد عنده حكاية تتحكي، أهم حاجة تكون القصة حقيقية".

مهرجان الإسكندرية للفيلم القصير أقيمت دورته التاسعة قبل أيام في فبراير الجاري، وشهد حضور كبير من محبي السينما في عروس البحر الأبيض المتوسط، إلى جانب مشاهير وصنّاع الفن.

تتكون إدارة مهرجان الإسكندرية للفيلم القصير من محمد محمود رئيسًا، وموني محمود للإدارة الفنية، ومحمد سعدون مديرًا، وهو احتفالية سينمائية تقام كل عام، أسسته وتنظمه جمعية دائرة الفن، ويهدف لنشر ثقافة الفيلم القصير، وتبادل الثقافات العربية الدولية، تحت رعاية ودعم وزارة الثقافة وهيئة تنشيط السياحة ووزارة الشباب والرياضة.

فيديو قد يعجبك: