أمير طعيمة يدافع عن لاعب الزمالك السابق الذي هاجم السيسي

دافع الشاعر أمير طعيمة عن اللاعب أحمد الميرغني الذي لعب سابقاً لنادي الزمالك ومر بازمة كبير بعدما قام بمهاجمة الرئيس السيسي.

وقال طعيمة عبر حسابه الشخصي بموقع "فيسبوك": "أحمد الميرغني‬ من سنة تقريبا انتقد أداء الرئيس السيسي علي الفيس بوك و حمله مسئولية دماء العسكريين و المدنيين في مصر و وجه له رسالة قاسية و إتهمه بالفشل في إدارة البلد، بعدها فسخ نادي وادي دجلة عقده معاه و رفضت كل إدارات الأندية المصرية التعاقد معاه رغم رغية العديد من المديرين الفنيين في ضمه وسط هجمة غير مسبوقة من الألاضيش و الاتهامات المعروفة بالتمويل و الخيانه و الهدم و الزفت الأزرق".

وأضاف: "غني اضطر في النهاية للعب لنادي جولدي "درجة رابعة، و من أيام طلب نادي الداخلية ضمه و النهارده نفس النادي تراجع و طبعا مش صدفة لأن أكيد مستواه الفني ما تراجعش خلال ٢٤ ساعة، يا جماعة أقسم بالله انتم فاهمين الدنيا غلط، و اللي انتم فاكرين انه حلول بيعقد المشاكل أكتر، ايه كم الظلم و الافتري ده، ليه كل يوم بتطردوا شاب من حضن بلده و تكرهوه فيها، عيب لما دولة بحالها تقف ضد مواطن واحد حتي لو كان له رأي ضد أهواء السلطة، مفيش كده في العالم كله و أي رئيس جمهورية في الدنيا له ناس بتعارض سياساته و ما لم يتورط المعارض في أي جريمة فمعارضته دي تحت بند التعبير عن الرأي اللي كفله الدستور اللي الدولة هي اول هادم ليه في معظم المناسبات".

وتابع: "اللي أفهمه ان في دولة قانون لو حد شايف ان الولد تجاوز قانونا و خرق الدستور يتعمل فيه بلاغ و يتم التحقيق معاه بدل حرب العصابات دي و مطاردته في أكل عيشه، إتق دعوة المظلوم، فإنها ليس بينها و بين الله حجاب" .. ارحموا الناس و كفاية ظلم عشان لا البنك الدولي و لا الجن الأزرق هيقوم البلد طول ما فيها ناس بتتظلم و ناس بتبرر الظلم و تدافع عنه".

واختتم قائلاً: "الولد تراجع و اعتذر و قال مش هتكلم تاني في السياسة و أمه ناشدت رئيس الجمهورية رغم انه اصلا اتهام رئيس جمهورية بالفشل ده شيء عادي جدا في اي بلد نصف متحضرة، و لو اللي بيحكم سادس الخلفاء الراشدين برضه هتلاقي مواطن يشوفه فاشل من وجهة نظره".