فيديو وصور.. "الحباش" أشهر أكلة رمضانية في البحيرة والسر في الخلطة

البحيرة - أحمد نصرة:

في سوق البندر، أقدم أسواق مدينة دمنهور، بمحافظة البحيرة، يتزاحم المشترون أمام "أم حسن" وابنيها حسن ومحمد لشراء "الحباش" أشهر وجبة رمضانية تعرف بها المدينة.

في البداية تقول أم حسن: "الحباش أكلة للغني والفقير البهوات بيقفوا عشان يشتروا الحباش، وكمان الناس إللي على قدها بيبقى أساسي عندها، لأن رغم طعمه إللي مفيش حد يقدر يقاومه، سعره على قد الإيد وبيأكل، وممكن تشتري كمية من أول 3 جنيه".

وتضيف أم حسن: "الحباش موجود طول السنة، لكن في رمضان الإقبال بيزيد عليه، وإللي بياكله مرة مش بيبطله، الناس بقت تجيلنا من محافظات مختلفة عشان تشتري الحباش والسر في الخلطة".

و يحدد محمد الجمل مكونات الحباش: "طماطم مبشورة، ملح، كمون، بهارات، خلطة الحباش، جوز الطيب، طحينة حمراء، بقدونس وشبت، ليمون، خل، زيت حار".

ويضيف الجمل: "ميزة الحباش عن أي حاجة تانية إنه ممكن يتحط كمقبلات جنب أي أكل تاني، وممكن يتحط كأكلة قائمة بذاتها، وأغلب الناس في دمنهور بيحبوا ياكلوه مع أم الخلول".

ويقول حسن الجمل: "ممكن الناس تشتري الحباش جاهز، وممكن تاخد مكوناته وخلطته الأساسية وتعمله بنفسها في البيت، لكن أهم حاجة ظبطة المقادير عشان يطلع حلو".

ويضيف: "أكتر مشكلة بتواجهنا دلوقتي هي ارتفاع سعر الطماطم، لأنها مكون أساسي في الحباش، ومع ذلك بنحاول بقدر الإمكان منغليش أسعارنا عن الناس".