"فاتن أمل حربي" الحلقة 11.. هل أقنعت "ميسون" فاتن العودة لزوجها "سيف"؟

كتب-وائل توفيق:

شهدت الحلقة الحادية عشر من مسلسل "فاتن أمل حربي"، حوار بين (فاتن) التي تجسدها الفنانة نيللي كريم، و"ميسون" الفنانة هالة صدقي بخصوص عودتها لطليقها (سيف الدندراوي) شريف سلامة.

وشهدت أحداث الحلقة الحادية عشر أيضا، رفض الدعوى التي رفعتها فاتن (نيللي كريم) لإحالة قانون الأحوال الشخصية للمحكمة الدستورية العليا لبيان ما فيه من عوار دستوري. وفي المحكمة صرخت "فاتن" في وجه طليقها سيف الدندراوي (شريف سلامة)، قائلة: "أنا مش هسيب حقي، ومش هسيب حقكم كلكم، جايز ماخدوش بس مش هستسلم".

ودار في الحلقة حوار بين هالة صدقي "ميسون" و نيللي كريم "فاتن":

ميسون: رحت بقى للشيخ يحيى وأفتالك؟

فاتن: أيوه، قالي، بقى نصيحة الشيخ يحيى غير نصيحة يحيى.

ميسون: آه، نصيحة عقل الشيخ يحيى غير قلب الشيخ يحيى.

فاتن: بطلي بقى.

ميسون: خديها من قصيرها نصيحة واسمعي كلام ست عملت آلاف التوكيلات في حياتها.

فاتن: أرجع لسيف؟

ميسون: لأ طبعا، أنا كان نفسي أقولك كده، بس بعد اللي عمله فيكي، والفرمة اللي فرمهالك مش هقدر أقول كده، يعني حط يابنتي في الغسالة خلاص، وهلف بيكي بعد كده على الدكاترة، طبعا مش هينفع.

فاتن: يبقى آخد الفلوس المليون جنيه.

ميسون: بس يابت، إحنا صحيح شحاتين، لكن شرفاء.

فاتن: على فكرة لازم تلحقيني، لإني أنا مش هعرف أدفع مصاريف الجمعية اللي جاية دي

ميسون: أنا عندي حل حلال، إنتي تكلمي سيف، تقوليله عايزة نتكلم بهدوء وعقلانية، ومستعدة أروح معاك البيت كمان، أنا عندي استعداد أروح الكينسيت ذات نفسه من أجل السلام، وتروحي تقوليله نفسي أطبخلك أنت وماما نظيمة، تعمليله بقى المسقعة اللي هو بيحبها.

نيلي كريم: مبيحبش المسقعة أصلا.

ميسون: مش وقته يعني، مش مهم، أي حاجة يطفحها هو وأمه والسلام.

فاتن: ماشي بعدين؟

ميسون: إنت فاكرة الفيلم بتاع الأستاذة سعاد حسني، موعد على العشاء؟

فاتن: أيوه، بس أنا لو جوزي حسين فهمي، هسمم اللي يبصله، مش هسمم حسين فهمي!

ميسون: لا مش وقت تعليق خالص دلوقتي، إنت تفتكري إنك هتسمي سيف

فاتن: طب لو صمم إني آكل؟

ميسون: وماله كلي معاه

فاتن: وأموت؟

ميسون: أيوه ما هو الموت في الواد ده حلال طبعا، وعلى الأقل البنات هيورثوا المصنع.

فاتن: المصنع مكتوب باسم أمه على فكرة

ميسون: آه ما هو ممكن يورثوا جدتهم

فاتن: يعني هقتله هو وأمه

ميسون: آه ولو ما ماتوش موتي نفسك

فاتن: أنا هموت نفسي أحسن

ويذهب سيف لـ فاتن ويطلب منها العودة لمنزلها ويهددها أن تعود إلا بشروطه. وتتلقى "فاتن" مكالمة هاتفية من السيدة التي تركت لها حقيبة النقود، وتخبرها أن تأخذ من الحقيبة على سبيل "السلفة". وتطلب فاتن من الشيخ يحيى (محمد الشرنوبي) رأيه ماذا تفعل الفترة القادمة.

وتعود فاتن لدار الاستضافة فتجد "مشيرة" -نزيلة بالدار- قد عادت لزوجها مضطرة. ويطلب "حسين" (جمال يوسف) مقابلة ميسون (هالة صدقي) ويعطيها مبلغ مالي فترفضه، فيسألها هل تريدين معرفة حقيقة عمل زوجك عادل؟ فترفض أن يخبرها. وتصدم "فاتن" حينما تشاهد درجات ابنتيها، فتقرر مغادرة دار الاستضافة والعودة لطليقها.

مسلسل "فاتن أمل حربي" بطولة: نيللي كريم، هالة صدقي، شريف سلامة، محمد ثروت، محمد الشرنوبي، خالد سرحان، محمد التاجي، بثينة كامل، حاتم صلاح، ومن إنتاج جمال العدل، وتأليف إبراهيم عيسى، وإخراج محمد جمال العدل.