شريف عامر.. رئيس تحرير "mbc مصر" يوضح تفاصيل جديدة عن مداخلة عادل إمام

10:51 م الخميس 18 مايو 2023

تطبيق مصراوي

لرؤيــــه أصدق للأحــــداث

كتب- يوسف عفيفي:

كشف طارق أمين، رئيس تحرير قنوات "mbc مصر"، تفاصيل جديدة عن مداخلة الزعيم عادل إمام مع الإعلامي شريف عامر، عقب موجة السخرية التي طالت الأخير، بعد تقديم الحلقة الأخيرة من برنامج "يحدث في مصر" عبر فضائية "MBC مصر"، قائلا: "لا تذبحوا الـ"شريف" بينكم!".

وقال أمين في منشور عبر صفحتها الشخصية بـ"فيسبوك": "تابعت زي ما كل الناس تابعت حالة الاحتفاء الشديدة بمداخلة الفنان الكبير عادل إمام امبارح بالليل لبرنامج (يحدث في مصر) مع شريف عامر، واللي خرجت في جزء منها من كونها خبر أو انفراد أو خبطة أو حتى جت بالصدفة إلى حالة من الجدل والصراخ والغضب ووصلت للإساءة كمان واللي طالت الأخ والصديق شريف عامر ومنها ما طال قناة (أم بي سي) اللي أتشرف أكون ضمن فريق العمل فيها".

وأضاف أمين: "بعيدا عن المداخلة اللي البعض وصفها بالانفراد أو جات بالصدفة أو.. أو.. واعتبر البعض التعامل معاها وادارتها بشكل راقي ومحترم من شريف عامر أو غير موفقة منه برضو.. فعندي بعض الملاحظات حابب أقولها، إذا سمح وقتك بالقراءة طبعا، أولها أن دي أول مكالمة بحسب تقديري من كام سنة للأستاذ عادل إمام، والأهم كونها جاية في توقيت ما تردد وما يزال يتردد عن الحالة والوضع الصحي للأستاذ عادل إمام، وبالتالي فأهميتها بلغة وسلو الشغلانة دي أنها بتكشف وتوضح وضعه وحالته الصحية ولو حطناها مع الصور اللي ظهرت امبارح من داخل بيته عن طريق المقربين بمناسبة عيد ميلاده الـ 83.."فده يبقي ابلغ رد على كل ما تردد عن الفنان الكبير.. ربنا يديله الصحة ويمتعه بطول العمر".

وأضاف: "الحاجة التانية: الأستاذ عادل إمام فنان كبير تربع على عرش السينما والتليفزيون والمسرح لأكثر من 60 سنة، وده إن دل فيدل على موهبة فذة وذكاء شديد والتزام كبير وقول زي ما تقول، والأهم في السياق ده كمان أن الأستاذ عادل إمام عارف امتى يتكلم وامتى يسكت.. امتى يظهر وامتى يختفي.. وبالتالي لما يوافق أو يحب -بشكل أدق- يطلع فيطلع من خلال المنصة دي أو القناة دي أو البرنامج ده.. فهو عارف بيعمل أيه.. وامتى وليه.. وده يخليك متأكد أن الأستاذ عادل إمام.. عارف كويس هيطلع مع مين ويقول إيه.. واللي يعرفه كويس عارف أنه محدش يقدر يقوله اطلع ومتطلعش أو قول أيه ومتقولش أيه".

وأوضح: "الحاجة التالتة.. التعامل مع المداخلة بشكل خبري بحت سواء انفراد أو خبطة أو حتى مكالمة جت بالصدفة، ده يخليك تشوف أن حالة الاحتفاء والجدل دي سببها اهتمام بقيمة وقامة الأستاذ عادل إمام وبالتالي فمسألة هي خبطة ولا مش خبطة.. ده الرد عليه بس -وبدون رغي أو هري كتير- الحالة والاهتمام والانتشار للمداخلة دي اللي تحولت لأخبار وعناوين على نطاق واسع إضافة بقى لحالة الجدل والصخب اللي دايرة خاصة وأن حضوره خلال المكالمة كان طاغي وكل كلمة ايفيه كالمعتاد.. والمؤكد أن المداخلة دي بتهد أي كلام عن حالته وصحته وخلافه، واللي تاكل عليها عيش شهور طويلة".

وتابع: "الحاجة الرابعة: ولو كنت وصلت لهنا فأنا بأشكرك واعتذر عن الإطالة، فهي تتعلق بشريف عامر نفسه، اللي يقدر يدافع عن نفسه، في إدارته للحوار جوه الاستديو أو علي الهواء لأنه هو السفرجي، واللي ورا الكاميرا الطباخين، ومعروف بقى مين اللي بيتعرض للكلام من الزباين/ المشاهدين سواء كلام حلو أو كلام في جنابه زي ما بيقولو".

وأكمل: "لكن حبيت أقول كلمتين عن الشخص ده واللي بتربطني بيه علاقة شخصية قبل المهنية، وباعتبره من أنضف الناس اللي مروا على الواحد في حياته، واللي بيتعرض لحملة شديدة هو اللي دفعني للكلام هنا -وأنا مش من اللي بيكتبو أو بيتكلمو علي السوشيال ميديا إلا فيما ندر- فأنا شايف أن الحملة الشديدة دي تبريرها في رأيي أو بشوفها في معظمها بسبب قيمة وقامة الضيف هنا اللي هو الأستاذ عادل إمام واللي محبينه بالملايين في أرجاء الوطن العربي وكانوا في أشد الحاجة للاطمئنان على حالته وصحته، وكانوا عايزين أطول وقت يسمعوه فيه ويطمنو عليه، وكمان الحملة دي واللي زيها توضح مرة بعد مرة ما يتوقعه وينتظره المشاهدين والمتابعين من مذيع بقيمة وأهمية شريف عامر كأحد اللاعبين الرئيسيين على طاولة البرامج المسائية، ونجم من نجوم ما يسمى ببرامج التوك شو خلال سنوات عديدة ماضية بدأها في قنوات وقنوات أخرى بدأت به، مقدما وما يزال يقدم وجبة متنوعة في المساء والسهرة تحترم عقلية مشاهدينه".

وتابع مدير تحرير قنوات "إم بي سي مصر": "يبقي إدارته للحوار زي اللاعب اللي بيحط الكرة بالطريقة المناسبة للتوقيت والظروف، لكن يبقى شريف عامر هو اللي الأستاذ عادل إمام قرر يتكلم عبر منصته، والملايين اطمنت على صحته عبر تلك المنصة وده المهم، لكن يبقي شريف عامر كمذيع لسنوات طويلة لم يتلون ولا بيسعى لإثارة دهشة حد ولا إعجابه أو تعاطفه، هو باختصار بيعمل الشغلانة ويروح.. لا هتلاقيه ضحك عليك.. ولا ضحك عليك حد - وأقصد أي ضيف ظهر معاه أو بيظهر أو هيظهر، وميزة شريف بحسب الناس العادية اللي في الشارع إنه مش محسوب على حد".

واختتم أمين قائلا: "طبعا في البعض مش بيحبوه أو دمه تقيل عليهم أو بيستغلسوه أو معترضين على طريقته أو شايفين إنه معندوش كاريزما، أو بتاع كلام مثقفين و.. و..و .. قول زي ما تقول.. فده برضو طبيعي وحق أي حد، بس في النهاية أنت صاحب القرار وفي ايدك ريموت التلفزيون على طول.. تتابع مين ومتابعش مين.. أما القلة اللي مش بتطيقه، وبيستهدفوه شخصيا وإنسانيا فمعنديش تعليق غير كلام شريف نفسه، يا عم كبر دماغك في حاجات أهم من الكلام عني".