رامي جمال ينصح جمهوره: البيوت تتهد على العرض والكرامة فقط

كتب- مصراوي:

نشر الفنان رامي جمال عبر صفحته على موقع التواصل الإجتماعي "انستجرام" صورة من رسالة وصلته من متابع له، يخبره أنه عاد إلى زوجته المنفصل عنها منذ 3 سنوات، بسبب أغنية لحظة بعادك.

ورد عليه رامي: "ربنا يخليكم لبعض ويهدي ما بينكم ويسعدكم"، وتابع معلقا "إمبارح قبل ما أنام جاتلي الرسالة دي وفرحتني جدا وعايز أقول حاجة من واقع حياتنا، الدنيا متعاشة مرة واحدة متفرطوش في اللي بتحبوهم بسهولة، إحنا للأسف جيل بيشوف الإنفصال والطلاق سهل رغم أننا اتربينا في بيوت كان بيحصل فيها مشاكل أكيد لكن كانوا أهالينا متمسكين إن البيوت دي ما تتهدش بسهولة".

وأضاف: "مشاكل الحياة كتير لكن متخلوش الأفلام والمسلسلات وحكاوي الناس تخليكم تطلبوا أو تستنوا من اللي بتحبوهم كل حاجة وما تعلوش سقف توقعاتكم إحنا اتعلمنا إن البيوت تتهد على العرض والكرامة فقط، لكن خلافات الدنيا العادية لأ، ما تفتكروش إن فيه حد حياته كاملة زي ما بتشوفوها على انستجرام والمسلسلات والأفلام، لو كل واحد وواحدة اتهيألهم إن الإنفصال هيخليكم بكرة تعيشوا بحرية وتلاقوا فرص وشركاء أحسن هتضيعوا من إيديكم ناس إحتمال كبير ما تتعوضش، أخيرا إحنا عايشين مرة واحدة فسامحوا وحبوا وفوتوا لبعض وامسكوا في حبايبكم.. وأخيرا محدش عايش حياتك فوانت بتحكي لحد عن مشكلتك مع شريكك خليك واثق إن رأيه وحياته مش قاعدة لازم تكون صح ".

وأنهى كلامه: وأخيرا إيه رأيكم في أغنية لحظة بعادك؟".

وانهالت عليه التعليقات من الجمهور وجاءت كالتالي: "بجد الأغنية فظيعة والكلمات والألحان والتوزيع وكل حاجة بجد أحسن واحد عنده فن إختيار الأغاني"، "كلامك كله صح وجميل جدا"، "كلام محترم من فنان محترم".

طرح رامي أغنية لحظة بعادك أمس على القناة الرسمية الخاصة به بموقع "يوتيوب"، من كلمات حسام سعيد وألحان محمود أنور.

يُذكر أن أخر أعمال الفنان رامي جمال هي أغنية "قمر ومنور" التي طرحها عبر موقع الفيديوهات يوتيوب.