السيسي: الناس في أوروبا مستحملتش زيادة الأسعار

كتب- إسلام لطفي:

قال الرئيس عبد الفتاح السيسي إن الله عز وجل أراد أن يكون لطيفا بنا خلال الظروف الحالية.

وأضاف السيسي، خلال تدشين مشروعات جديدة بقناة السويس: "مكناش عارفين أننا سيكون عندنا تسعير بالشكل ده.. أوروبا سعرت بالثمن الحقيقي، الناس مستحملتش ومش متحملة رغم أن دخلهم أكتر مننا بكتير وأغنى مننا بكتير ورغم كده هما بيعانوا.

وتابع: إحنا حاولنا ده ميحصلش وبالتالي معكسناش أسعار الطاقة على المواطنين، فيه 17 مليون وحدة الـ 5 شرائح الأولى بياخدوا على تسعير الغاز القديم اللي بـ 2.5 و3 دولار للوحدة بـ 50% من تمنها، اللي بتعتبروه ضاغط عليكم، طب لو هي بقى بتمثن الوحدة 50 و60 و70 كانت الناس هتعمل إيه وهنجيب ده منين؟، مكناش هنقدر.

وواصل الرئيس: ربنا سبحانه وتعالى أعاننا على ده، بقولكم الكلام ده عشان نكون واثقين من نفسنا وكل الكلام اللي ممكن يتقالكم يخوفكم ده كلام انتبهوا ليه كويس، فأول حاجة إحنا حريصين عليها منعسكش تسعير الطاقة أو السلع بتمنها الحقيقي على الناس، وده الحكومة اشتغلت عليه وممكن حزمة إجراءات الحماية اللي اتعملت وأعلن عنها أول الشهر يمكن تكون داخلة في هذا الإطار، ثم المبادرات الموجودة لتوفير السلع في الأسواق بأسعار لا تشكل عبئا على الناس بشكل كبير، عشان المواطن ميعانيش أكتر من كده.

وقال السيسي: بقول الكلام ده عشان تبقوا عارفين إحنا كمسئولين حريصين على متبقاش الأمور الضاغطة على الدنيا كلها وعلينا كمان، إننا نصدرها ليكم بقدر الإمكان، وإحنا عندنا توفير للسلع الأساسية وكنا حريصين خلال السنتين تلاتة اللي فاتوا من 2016 حتى الآن أن يكون لدينا ما يقرب من 6 شهور في كل السلع الأساسية زي الزيوت والرز والسكر والقمح، عشان المواطن يكون مطمن أن السلع موجودة وميبقاش فيه ضغط على الأسواق ولا الأسعار، ومنبقاش كمان بنعكس الظروف الموجودة في الخارج مباشرة على المواطن المصري.

وأضاف: يمكن سمعتوا التسعير بتاع القمح والذرة، السياسة اللي متحركين فيها من خلال الحكومة ووزارة الزراعة أننا هنعلن عن الأسعار الاسترشادية لبعض السلع اللي ممكن الدولة تشجع المواطنين في الريف على أنهم يزرعوها وأيضًا عشان نوفر عملة أو لو حتى الظروف الدولية لا تسمح لينا، فتكون حاجتنا تكون من أرضنا.