عمرو أديب: "مصر نجحت في عبور تسونامي اقتصادي عدة مرات منذ 2013"
تطبيق مصراوي
لرؤيــــه أصدق للأحــــداث
كتب- محمد أبوالمجد:
قال الإعلامي عمرو أديب: "قبل ما أبدأ الحلقة في نقطة نظام بسيطة إن جاز لي أخلي الناس المهتمة بالشأن العام، أقولهم نصيحة بسيطة أو تنبيه، أن العالم كله سواء عالم عربي أو أجنبي كل شيء مرتبط بكلمة واحدة، واهتموا بيها السنة دي وهو الاقتصاد ثم الاقتصاد ثم الاقتصاد واللي مش فاهمينها يخلوا بالهم من الأسعار، لأنه هدف كل العالم وكل الدول".
وأضاف "أديب" في خلال تقديمه لبرنامجه "الحكاية" على فضائية "إم بي سي مصر" اليوم السبت: "الصراع الأمريكي في العالم دلوقتي إزاي أجيب برميل نفط سرعه أقل وغاز بسعر أقل وطاقة بديلة بسعر أقل"، موضحًا: "لازم كلنا نقف مع البلد والدولة ونشوف نقدر نعمل ايه لأن كل دولة في العالم ماشية في بحر التضخم، والمركب جواها الشعب وماشية في بحر محدش عارف عامل ازاي والأسعار بتاخد المركب تنزلها وتطلعها، ولو المركب مش ماشية كويس هيبقى في مشاكل".
وتابع: "لازم كلنا نقدر نعدي الـ 6 أشهر القادمة، لأن العالم كله بيحاول يعديها"، موضحًا أن أوهام السعر الثابت قد تغيرت ونتحدث عن دول المفروض اقتصاديها يكون جيد، قائلًا: "نتحدث حاليًا عن أزمة إمداد وخامات وطاقة، وهم 3 أزمات".
وأردف "أديب": "دخلتك السوبر ماركت حاليًا مش نفس الدخلة من شهر، والتضخم يقاس بسلة السلع التي يتم شراؤها كل شهر"، مؤكدًا: "أن الدولة المصرية منذ عام 2013، نجحت في عبور تسونامي اقتصادي عدد من المرات عبور موقف والناس اللي راكبين مركب مصر الاقتصادية لم تشعر بوجود هزات أو مشاكل، وهذا العام عام محوري في هذا الأمر، لأن الأشياء ليست في يدنا".
وأوضح: "مصر بلد ناجح في حلوله الاقتصادية وعملت أصعب القرارات في التاريخ مثل البنزين والدولار وأشياء كثيرة جدًا".
فيديو قد يعجبك:
