إعلان

حسام موافي عن منحه للدكتوراه الفخرية لسمية الخشاب: "ورب الكعبة ما أعرف شكلها"

01:28 ص الخميس 11 مايو 2023
حسام موافي عن منحه للدكتوراه الفخرية لسمية الخشاب: "ورب الكعبة ما أعرف شكلها"

كتب- محمد أبوالمجد:

علق الدكتور حسام موافي، أستاذ طب الحالات الحرجة بكلية طب القصر العيني، على حالة الجدل التي أثيرت عقب انتشار صورة له عقب تقديمه للتكريم والدكتوراه الفخرية للفنانة سمية الخشاب، في منظمة تابعة للأمم المتحدة، قائلًا: "ما كتب لا علاقة له بالحقيقة، ولما يجيلك جواب من الأمم المتحدة مزور أو لا أنا معرفش، وتلاقيهم بيقولولك تعالي هنكرمك وكرم زيك قبل كده الرئيس أنور السادات والدكتور مجدي يعقوب وبابا الفاتيكان، فروحت وكنت أول المكرمين"

وقال "موافي" في مداخلة هاتفية لبرنامج "يحدث في مصر" على فضائية "إم بي سي مصر" اليوم الأربعاء: "ليس لي علاقة بمن يتم تكريمهم لأني واحدًا من ضمن المكرمين أنا مالي ومال اللي بيتكرموا، أنا مشيت قبل انتهاء الحفل، وفنانة دخلت وشافتني سلمت عليا راح حد لاقط الصورة دي، وقالك حسام موافي هو من كرم هذه الفنانة".

وعن معرفته بالفنانة سمية الخشاب، رد قائلًا: "والله العظيم ورب الكعبة أنا ما أعرفها ولا أعرف شكلها، الناس قالتلي دي الفنانة فلانة فسلمت، هل يصح واحدة داخلة تسلم عليا أقولها لأ مسلمش عليكي، دا اللي حصل بالظبط وفوجئت بالناس اللي بتتكلم بغير علم، ومش عايز أرد على حد بيتكلم جاهل".

وأردف: "والله وحياة أولادي ورب الكعبة ما أعرف سمية الخشاب، وبحلف عشان اللي كتب واللي ظلم يسمع"، مؤكدًا: "مره جالي واحد في عيادتي وقعد قدامي بقوله حضرتك اسمك ايه، قالي الظاهر حضرتك لا بتشوف سينما ولا تليفزيون، اسمك ايه بقى، قالي اسمي محمود عبدالعزيز، قولتله طب ايه علاقتك بالسينما والتليفزيون، وقلت لبنتي كده قعدت تضحك وقالتلي طب مشوفتش رأفت الهجان".

وأوضح: "أنا مش فاضي ومش بقول إني واعظ أو شيخ أو أي حاجة، ولكني بحاول إعمال العقل في الآيات التي بها إعجاز علمي"، مؤكدًا: "كنت مع الدكتور محمد مختار جمعة وزير الأوقاف قولتله بلاش كلمة إعجاز علمي وخليها إعجاز رباني لأن الله هو من عمل هذه المعجزات في القرآن، وأنا حاليًا كان لدى محاضرة علمية في مسجد تابع للأوقاف ضمن الأسبوع الثقافي، وهي المحاضرة رقم 20، وكل واحد كتب عن الواقعة الكاذبة الغير حقيقية هيعرف الكلام دا يوم القيامة".

فيديو قد يعجبك: