إلهام شاهين تكشف كواليس قرارها بالتبرع بالأعضاء بعد الوفاة

تحدثت الفنانة إلهام شاهين عن قرارها بالتبرع بأعضائها بعد الوفاة، مؤكدة أن الدافع وراء هذه الخطوة هو الرغبة في فعل الخير وترك أثر إنساني ممتد بعد رحيلها.

وقالت إلهام شاهين: "عشان أعمل خير، عشان يبقى صدقة جارية بعد وفاتي.. لأن ده فعلًا صدقة جارية إنه خلاص هو الجسم هيفنى هياكله الدود، يعني مش هيضرني في حاجة إن أنا أعيش حد بأجزاء من جسمي.. طبعًا إذا كانت لسه سليمة، هو مش أي حد يقدر يتبرع ومش في أي سن، يعني لازم ظروف معينة.. في حاجات ممكن، يعني الجلد ممكن الواحد يتبرع بيه في أي وقت، القرنية، وهكذا".

التبرع بالأعضاء والقانون

وأشارت إلى مطالبتها السابقة بتفعيل قانون التبرع بالأعضاء، قائلة: "القانون ده على فكرة موجود من 16 سنة في مصر ولكن لم يتم تفعيله.. يعني القانون موجود، طيب أنا لو مت دلوقتي وأنا قايلة لأهلي أنا عايزة أتبرع بأي جزء سليم في جسمي، يروحوا بيا فين؟ وفيه حاجات لازم فورًا، يعني القلب لازم يتنقل في التو واللحظة".

وأكدت أنها بحثت الأمر من جميع الجوانب قبل اتخاذ القرار، موضحة: "آه طبعًا سألت على كل التفاصيل.. سألت علميًا ودينيًا، وسألت في كل التفاصيل".

إلهام شاهين ترد على الانتقادات

وقالت ردًا على بعض الانتقادات التي اعتبرت أن الجسد ليس ملكًا للإنسان: "ده كلام فارغ.. لأن طيب اللي مات في البحر وأكله السمك ما عندوش جسد؟ الطيارة وتنفجر ما عندوش جسد.. دي حاجات قدرية غير إنك تبقي مقدمة على ده بكامل إرادتك.. أيوة ما هو خلاص إيه اللي هيحصل يعني الجسد خلاص انتهى، الروح هي بقى اللي هتتحاسب وهي اللي موجودة عند اللي خلقها.. لكن الجسد خلاص هياكله الدود، فإيه المانع إن أنا أعيش كذا حد؟ لأن إنت بتقدر تتبرع بالكلى، بالكبد، بالقلب، بالأمعاء، بالجلد، بالقرنية.. ده لو ما فيش حاجة فيا سليمة خالص وبس عينيا مفتحة وممكن أدي القرنية لواحد أعمى عشان يفتح، ده خير عظيم.. ده خير عظيم".

وصية إلهام شاهين

كما كشفت عن رد فعل أسرتها تجاه القرار، قائلة: "في الأول اتخضوا وقالوا إزاي يعني؟ إحنا هنبقى مخضوضين إن إنتي قدامنا جثة وهنفكر ساعتها هنتبرع بإيه؟ فقلت لهم دي وصية، يعني دي وصية ميت ما فيهاش هزار.. وبعد كده تقبلوا، خلاص وأقنعتهم".

إلهام شاهين شاركت الفنان عمرو سعد في رمضان 2025، بطولة مسلسل سيد الناس، إخراج محمد سامي، وشارك في العمل مجموعة كبيرة من النجوم، بينهم: إنجي المقدم، ريم مصطفى، منة فضالي، بشرى.

اقرأ أيضًا:

"سنيد تهزيق ومعلش ماتعيطيش".. أزمة بين "البلوجرز" بسبب رامز جلال

"زغردت لما اتأجل".. سوسن بدر تكشف كواليس أصعب مشهد في "الست موناليزا"

"إنتي بطلتي السنة الجاية".. يارا السكري تفجر مفاجأة عن أحمد العوضي