عمرو عبدالجليل "غول" وعمرو يوسف عالمي.. "طايع" مسلسل الوحوش في تغريدات "تويتر"

كتبت- منى الموجي:

نجح مسلسل "طايع" في جعل الجمهور يعيش حالة من الترقب يملؤها الحماس، والخوف مما ستسفر عنه الأحداث في الحلقات المُقبلة، خاصة وأن كل حلقة تشهد تطورات غير متوقعة على مستوى الأحداث والأشخاص، ليحصد إشادات عدد كبير من متابعيه ليس فقط من الجمهور العادي ولكن من نجوم الوسط الفني، الذين أشادوا بجودة السيناريو، والموسيقى والتمثيل، والإخراج، وكل العناصر التي صنعت عملًا ينتظرونه يوميًا بشغف كبير.

ومن بين الإشادات التي حصل عليها "طايع" على مدار الأيام الماضية..

- كتب السيناريست تامر حبيب عبر "إنستجرام": "بحب وإعجاب وتقدير واحترام وامتنان أهنئكم يا أصحابي وزمايلي الناجحين، على هذا المسلسل الممتع الشيق، ومش هاذكر أي أسماء مع إني هاين عليا أخص كل واحد فيكم سواء أمام أو خلف الكاميرا بالتهنئة والإعجاب بس أخاف أنسى حد وماينفعش مجهود أي حد فيكم يتنسي أو مايتقدرش".

- وكتبت آيتن عامر عبر "تويتر": "مسلسل طايع سخن واحلو اكتر واكتر"، وبعد وفاة (مقتل) فواز ومهجة علقت "طايع انتوا بجد بقا دمكوا تقيل"، وأضافت "عمالين يموتوا الشخصيات اللي بنحبها.. بس برضه هنتفرج".

- وعبر الفنان محمود العسيلي عن إعجابه بالمسلسل، وكتب عبر "تويتر": "في الحاجات اللي أنا باتفرج عليها طايع أقرب مسلسل لمستوى الحاجات اللي بنشوفها برا.. سريع وغير متوقع وأهم حاجة مشاهد الحشو اللي فيه تعتبر قليلة أوي.. وأحلى حاجة إن كل الوجوه الجديدة اللي فيه وحوش تمثيل. وعمرو عبدالجليل حضرتك في حتة تانية.. تحياتي إلى كل فريق العمل".

- وكتب محمد محسن عبر "تويتر" موجهًا كلماته للمخرج عمرو سلامة: "مش كفاية ألف مبروك وبس، لكن بجد شكراً أنت وكل فريق عملك على المجهود العظيم اللي باين في كل تفاصيل المسلسل".

- كذلك حرص الفنان صلاح عبدالله على تهنئة الفنان عمرو يوسف، وكتب عبر "تويتر" موجهًا كلماته للفنانة كندة علوش زوجة "عمرو": "رغم إن شهادتي مجروحة بسبب جوزك ورغم إني عمري ما لعبت دور الناقد وشايف إن دا غلط أصلاً لكن كمتفرج عادي أري طايع يستحق فعلاً لأنه متميز من كل الجوانب بداية من الكلمة حتى الصورة النهائية التي نراها، أتابعه بحب وشغف فلكل فريق العمل كل الشكر".

أما تعليقات الجمهور فمن بينهما من أشاد بالعمل ككل، والبعض الآخر اختار التغزل في أداء أحد صنّاع العمل وأبطاله، وتوجيه التحية له، ومنها:

- طايع من الأعمال النادرة جدًا في الدراما المصرية، وقد إيه فيه حرفية في الأداء وإن الأحداث ممكن تتغير في أقل من ثانية بتخليك دايمًا متحمس ومش متوقع إيه اللي هيحصل؟

- عمرو يوسف وعمرو عبدالجليل حاجة محترمة في دراما رمضان ما شاء الله، غير ناس تانية مفكرة الفلوس كل حاجة.

- بصراحة المسلسل عالمي، وكل يوم بعد يوم تألق وإبداع من عمرو يوسف وصبا مبارك، لكن التحية والتقدير للنجم المبهر عمرو عبدالجليل.

- إيه الإبداع ده؟، ياريت الناس اللي عاملة نفسها بتعرف تألف تخرج وتعمل مسلسلات ملهاش هدف ولا فكرة يتعلموا من مسلسل طايع، كل حاجة تحت مسمى الإبداع هدف وتوصيل فكرة وتأليف إخراج ممثلين، انتو بجد مبدعين كل اللي شارك في العمل ده.

- شابوه لكل القائمين على هذا العمل المميز، لا سيما المبدعة صبا مبارك والرائعين عمرو عبدالجليل وعمرو يوسف. مسلسل شيق فعلا ويستحق المشاهدة.

- أنا بعمل وقفة مع نفسي وأنا بتفرج على طايع كل خمس دقايق، وأقول لنفسي بس يا حبيبي ده تمثيل مش حقيقي، يا بابا حرام عليك نفسك أنت كبرت على الكلام ده طب خلاص متزعلش هنودي مهجة روما.. شكرا يا جماعة والله كنت قربت أنسى الإحساس ده.

- المسلسل الوحيد اللي بيتفرج عليه أكتر من ٦٠ مليون في وقت واحد، العالمي عمرو يوسف.

- مسلسل جامد وأحداث واقعية.. شابوه عمرو يوسف وعمرو عبدالجليل.

- يعني استحملنا موت فواز وموت مهجة وقلنا ضاحي هيصبرنا تقوموا تموتوه حرام يعني اللي بتعملوه فينا ده.

- الميعاد اليومي للعياط والحماس للأحداث الجديدة والانبهار بالأداء، مسلسل الوحوش.

- لما مسلسل يبقى من تأليف عائلة دياب وإخراج عمرو سلامة وبطوله عمرو يوسف وعمرو عبدالجليل وصبا مبارك فلازم ينجح نجاح مكتسح.

- عمرو يوسف فنان خارج التصنيف

- عمرو عبدالجليل.. بدون أي مبالغة ده أفضل ممثل في رمضان السنادي.. في مكان تاني لوحده والله، بيعمل دور الشر بعبقرية جدا، وفي نفس الوقت يخليك تحبه وتتعاطف معاه.. في وسط كل الجبروت اللي عنده مهما جت سيرة بنته بتحس بتحول غريب في الشخصية.. يستحق أوسكار بجدارة والله.

- عمرو عبدالجليل أحسن ممثل في مصر.

- أوسكار يا ريس حربي.

- عمرو عبدالجليل لن يتكرر في تاريخ السينما المصرية بجد بحس إنو طيب أوي فوق الخيال، وبيصعب عليا لما تيجي سيرة بنته وبيتحول 180 درجة، عشان ياخد حقها من قمة الحنين لقمة الغضب شابووووه، يوسف شاهين كان شايف فيك اللي إحنا شايفينه دلوقتي.

- طايع المسلسل كله تحفة بس أداء عمرو عبدالجليل وهمي.

- غول تمثيل والله، في شره وفي ضعفه وفي هيبته وخفة دمه، وحتى في مجرد تونات صوته، ربنا يديك الصحة ويخليك لينا يا عم عمرو، أنا متثبت قدام الشاشة وأنت في أي مشهد.

- عن حربي: مشهد وهو داخل يطمن على مهجة وهو عارف إنه كدا كدا هيقتلها واختلاط المشاعر واللمعة اللي في عنيه إيه يا جدع في إيه؟

- مسلسل طايع الأفضل هذا الموسم على جميع المستويات كتابة "الحتمية في الدراما هنا هي سبب جمال النص"، إخراج، إيقاع، تمثيل"، عمرو عبدالجليل مميز جدا، كنت أتمنى أن يكون فيلم أكثر من مسلسل.

- عمرو عبدالجليل هو أتقل شخصية وأتقل ممثل في المسلسل جنبه حاسس الباقيين كلهم هواة.

- إزاي قدرتي تموتي وتحيي ألف مرة حقيقي كده، وتوصليلنا الرعب بالطريقة دي شابووو صبا مبارك، إنتِ بجد قهرتينا، طايع ومهجة كابلز يوجع القلب وبجد شابوووو.

- عمرو عبدالجليل أبكيتنا تعاطفا من كلامك على بنتك وبعدها أبكيتنا ظلما ورغبة في القصاص والانتقام من الظالم إيه بتقتل فراخ؟

- طايع مبهر وأداء عبقري من الممثله الأردنية صبا مبارك والرائع عمرو عبدالجليل

- نهاية حربي هتكون قصة تانية وكلنا حنعيط عليه خليكم فاكرين دا كويس. وبالرغم من دا كلوا إلا إني بحبه برضه.

- عمرو عبدالجليل ما بيمثلش ده بيرسم أقسم بالله، هو مين كان ممكن يعمل دور حربي تقريبا هو مثل والدور اتكتب على تمثيله.

- يا خلق عفريت التمثيل بعشقك يا جدع حربي، يخربيت أم جبروتك يا جدع اللي يعرف يوصله يقوله إننا من مريديه.

- اكتشاف رمضاني جميل علي القاسم والله عمرو سلامة ييطلع ناس عظيمة.

"طايع" تأليف محمد وشيرين وخالد دياب، بطولة عمرو يوسف، عمرو عبدالجليل، صبا مبارك، سهير المرشدي، أحمد عبدالله محمود، محمد علي، أحمد داش، مها نصار، إخراج عمرو سلامة، وإنتاج شركة ماجنوم لمالكيها هشام تحسين ورامي إمام.

لمشاهدة مسلسلات رمضان 2018 قبل أي حد..

جهز إفطارك من طبخة ع السريع: أسرع طريقة لتجهيز الأكل