عمرو أديب معقبًا على تسريبات فكري الهواري: لو الكلام ده حقيقي هيكون مصيبة

كتب- حسن مرسي:

عقب الإعلامي عمرو أديب، على الفيديوهات المتداولة على مواقع التواصل الإجتماعي لشخص يدعى فكري الهواري مدير بسلسلة محلات تجارية شهيرة وأثارت جدلاً كبيرا على مواقع التواصل الاجتماعي.

وقال أديب، خلال برنامجه "الحكاية"، المُذاع عبر فضائية "mbc مصر"، مساء الإثنين: "الساعات القادمة سيكون هناك رد من النيابة العامة على تلك التسريبات، محتاجين حد يفهمنا ويقولنا كلام الراجل ده حقيقي ولا لأ".

وتابع مقدم برنامج الحكاية: "وارد جدًا يكون كلامه مجرد "نخع وهجس"، وميكونش يعرف حد، أو إن الفيديوهات بتاعته كانت نوع من أنواع التباهي، ويبدو أن هذا الرجل كان نافذًا، ولكن لو الكلام ده حقيقي هيكون مصيبة ولازم يتجاب كل الفساد اللي معاه".

وأكمل الإعلامي عمرو أديب: "لو كان الكلام فارغ مكنش اتقبض عليه ولو التسريبات دي صحيحة ستكون أكبر قضية فساد في تاريخ البلد، لما تسمع الفيديوهات لازم تشهق، هذا الرجل يقوم بعلميات أندر جراوند وليست نظيفة وده من واقع قيادته لعملية إتلاف الكاميرات في قضية نجل الهواري".

واستطرد: "ده ميتسبش ولازم نعرف هل هو مدعي أو الفيديوهات المسربة صحيحة، فيه ريحة فساد والناس بتهري ولازم يكون هناك بيان واضح وشفاف من أجهزة التحقيق، مينفعش تسيبوا الناس كده من غير توضيح".

واختتم أديب: "ده واحد بيقول أنا دولة 6 أكتوبر، متسائلًا: "هل هناك منظومة فساد تتحرك في البلد؟"، متابعًا كده ممكن يكون فيه ناس فوق وناس تحت، والاحساس بعدم العدالة شيء بغيض وسيء ويؤذي مشاعر الناس".