"ابن الوز عوام".. عمرو أول إعدادية البحيرة امتداد لتفوق أسرته (فيديو وصور)

البحيرة - أحمد نصرة:

وسط أسرة معروفة بتفوقها العلمي والدراسي وجد عمرو نفسه يشق طريقه ليسير على نفس درب والده عميد كلية الصيدلة بجامعة دمنهور، ووالدته المعلمة الناجحة، وشقيقيه المهندس والطبيبة، فحصد المركز الأول في امتحانات الشهادة الإعدادية بالبحيرة، محققًا مقولة "ابن الوز عوام".

في البداية يقول عمرو: "وأنا بشوف نجاح والدي ووالدتي وإخواتي في حياتهم، أكيد ده كان بيشكل ضغوط عليا، إني لازم أبقى ناجح ومتفوق زيهم، ولكن الحمد لله قدرت أحول الضغوط لحوافز تدفعني للاجتهاد أكتر".

ويضيف: "أصحابي بلغوني بالنتيجة وساعتها كنت خايف تكون غلط، دخلت على الموقع وفضلت أعمل رفرش كذا مرة لحد ما اتأكدت إنها صح، ساعتها بلغت قرايبي وأنا طاير من الفرحة".

ويوضح عمرو: "مفيش ساعات كنت بحددها للمذاكرة، لكن في بعض الأوقات كنت بذاكر 10 ساعات في اليوم، ومش بربط نفسي بوقت محدد لكل مادة، على حسب المادة ما تحتاج مني".

وعن توقعاته لنتيجته يقول عمرو: " لما لقيت نفسي في الترم الأول نقصت نص درجة بس، حسيت إن الموضوع مش صعب وإني أقدر أطلع من الأوائل فضغطت على نفسي في المذاكرة، والحمد لله".

وعن خططه للمستقبل يقول عمرو: "حاليًا مش مستقر بنسبة 100% على خططي للمستقبل، لكن الأقرب هو اختيار المجال الطبي إن شاء الله، حاسس إني بميل ليه أكتر من أي مجال تاني"

ويلتقط والد عمرو، الدكتور جمال عمران، عميد كلية الصيدلة بدمنهور أطراف الحديث: " اتعودت مع عمرو وإخواته أسيب كل واحد يختار رغباته زي ما هو عاوز، ودوري بس بيكون النصح والتوجيه، ولكن الفضل الأكبر بعد الله لزوجتي إللي بتقوم بمهمة المتابعة مع الأولاد أكتر مني، وبفضل تخصصها وخبراتها التربوية بتأدي الدور ده على أكمل وجه".

وعن دورها معه تحدثت والدة أول الإعدادية: " من مميزات عمرو الاستجابة للنصائح، وفي الفترات إللي كان بيشعر فيها بالزهق والضيق مكنتش بضغط عليه، وكنت بطلب منه يعمل أي حاجة بيحبها أو هواية بيمارسها بعيد عن المذاكرة عشان يخرج من الزهق لغاية ما يجدد نشاطه وتركيزه"

كان اللواء هشام آمنة، محافظ البحيرة، اعتمد أمس الأحد، نتيجة امتحان شهادة اتمام مرحلة التعليم الأساسي "الإعدادية العامة" بنسبة نجاح 72%.

بلغ إجمالي عدد الطلاب المتقدمين للإمتحان 115 878 طالب حضر منهم 114ألفًا و143 طالبًا نجح منهم 81 ألفًا و703 طلاب.