السيسي للمواطنين قبل رمضان: عاملين حسابنا على كل حاجة.. انزلوا وعبُّوا

كتب- أحمد السعداوي:

قال الرئيس عبد الفتاح السيسي، إن هناك نقاشًا كبيرًا دائمًا يقول يا ترى إحنا كنا محتاجين نعمل كل الشغل ده؟ وهل له آثار إيجابية ولّا سلبية؟ موضحًا: أتكلم عن مشروع قومي لزيادة حجم قدرتنا على تخزين القمح في الصوامع، لتصل إلى 5.5 مليون طن.

وأضاف السيسي، خلال حضوره احتفالية تكريم المرأة المصرية والأم المثالية، اليوم الأربعاء: آه حطينا فلوس كتير؛ لكن لقينا تمن اللي بنفقده سنويًّا، حوالي 20% من اللي موجود؛ هانقول احنا بنستهلك 17 أو 15 أو 10 ملايين طن قمح، طب الـ20% يعني 2 مليون، تمنهم كام؟ بنسيبهم في أماكن مفتوحة، ولما عملناهم النهارده مخزون القمح بقى يكفي 4 أشهر.. وماعندناش مشكلة لا في سلع أساسية ولا أي شيء، حاجتنا موجودة وبزيادة وده بفضل ربنا.

واستطرد الرئيس: محتاجين نتعامل مع مطالب وتحديات الدولة بما تتطلبه الحلول العلمية، ويعني إيه دولة فيها 100 مليون.. دي حاجة مش بسيطة، من أول ما السفينة تيجي لغاية ما يبقى رغيف عيش.. السلسلة دي مش قليلة، ولو فيها خلل هتسمَّع، طب دلوقتي فيه أزمة عالمية، بعد ما كنا بنتكلم في 70 دولارًا لبرميل البترول بقى 120 دولارًا، طب احنا عندنا أزمة، يعني حد بيروح محطة مايلاقيش بنزين؟!

وقال السيسي: محتاجين واحنا داخلين على شهر رمضان... طب أنا هاقول لكم على حاجة، ووزير الدفاع يشهد عليَّ، وأنا وزير دفاع قُلت لهم لو سمحتم حطوا طبق واحد، والطبق ده يبقى فيه يا فراخ يا.. مش عارف الكلام ده مناسب ولا إيه، هو فيه إيه؛ كفاية إننا نشوف بعض.. الدول مش بتتعمل بالأماني والأحلام والكلام، لكن بالجهد والمثابرة والوعي.

واستطرد الرئيس: احنا عندنا مشكلة؟ لا والله، اعملوا اللي انتم عايزينه، انزلوا عبُّوا، لسه الجيش منزل 2 مليون كرتونة، وممكن ينزل 20 مليون كرتونة، وعاملين حسابنا على كل حاجة.