أحمد فهمي للإبراشي: شيكابالا شتم الأهلي وجماهيره مع أنه طلب مني التوسط له باللعب به

كتب- حسن مرسي:

كشف الفنان أحمد فهمي، كواليس ما دار بينه وبين كابتن نادي الزمالك في الفيديو الذي انتشر على مواقع التواصل الاجتماعي، والشجار الذي وقع بينهما، وقال: "والله أنا كنت رايح أصالحه وبخبط على دماغه وأهزر معاه علشان يفك لكن هو شتم جمهور الأهلي واللي بيشجعوه، وأنا رديت عليه قولتله كل الحاجات اللي بيحبها".

وأضاف فهمي في مداخلة هاتفية مع الإعلامي وائل الإبراشي، ببرنامج "التاسعة"، المُذاع عبر القناة الأولى المصرية، مساء السبت: "أنا ممكن أعمل اللي بتعملوا بس أنا مش هعملوا، وهو قال إحنا كنا بناكل في طبق واحد، وبعدها شتم جمهور النادي الأهلي وكيان النادي الأهلي، وأنا شتمته هو شخصيا ومقدرتش أشتم كيان نادي الزمالك أو جمهور نادي الزمالك، خصوصا أن كان في رموز لنادي الزمالك موجودين منهم حازم إمام وأمير مرتضى منصور".

واستطرد الفنان أحمد فهمي: "شيكابالا لما كان في البرتغال طلب مني أني أتوسطلوا يروح النادي الأهلي ودي حاجة كانت بيني وبينه، وأنا حاولت أساعده والراجل مكنش غلطان، هو كان برة نادي الزمالك وكان من حقه ياخد فرصه يروح النادي الأهلي، وأنا لما بعض الجماهير هاجمته أنا حطيت صورته عندي وأعلنت تضامني معاه، وإحنا مش هنبقى صحاب تاني، على الأقل كنا أصحاب وأنا لا أجرؤ أني أشتم نادي الزمالك وجماهير نادي الزمالك".