بسمة وهبة: "حالتي صعبة جدًا وربنا كرمني بطبيب إنجليزي تحسنت على يده"

كتب- محمد خميس:

قالت الإعلامية بسمة وهبة: "كنت سافرت للعلاج في الخارج لأني كنت في حالة صحية سيئة جدًا وكنت أعاني من مشكلتين في المعدة، متابعة: "حالتي مش حالة نادرة بس حالتي كانت صعبة جدًا ومعدتي مينفعش يدخل فيها منظار من كتر العمليات اللي اتعملت فيها فبقى خطر عليا أعمل عمليات فيها".

وأضافت "وهبة" في حوارها عبر "سكايب" لبرنامج "مساء دي إم سي" اليوم السبت: "ربنا كرمني بدكتور إنجليزي وجد لحالتي علاج وبقالي شهر مجاليش أي أعراض من اللي كانت بتحصلي" ، موضحة أن المشكلة الثانية أنها كانت تعاني من نزيف، وعقب الفحوصات وجدت أن هناك هرمونات نشطة تساعد على تنشيط الخلايا السرطانية، قائلة: "دا المفترض ميكونش عندي عشان أنا مريضة سرطان، وعملت تحاليل وتم إرسالها لأمريكا عشان يعرفوا خطة علاجي هل بإزالة الورم نفسه ولا أخد علاج والنتيجة دي اللي هتحدد".

وتابعت: "في كل الأحوال أنا في نعمة وفضل من ربنا وزي الفل"، موضحة: "ملخص تجربتي مع السرطان الفترة اللي فاتت أني أسلم أمري لله، مبزعلش على حاجه ابتلى بيها، وبنبسط وبسجد وبقول يارب أكيد دي منحة، وبنصح الناس تتفائل بأن أكيد حاجة وراها خير".