أيمن القيسوني يكشف كواليس مشاركته في مسلسل "يوتيرن"

كتب-وائل توفيق:

كشف الفنان أيمن القيسوني عن كواليس مشاركته في مسلسل "يوتيرن" الذي يعرض ضمن الموسم الدرامي الحالي 2022.

وقال أثناء استضافته في برنامج "نجوم رمضان أقربلك" عبر إذاعة "نجوم إف أم": "أنا كنت عارف إني داخل مع شركة العدل وعارف أنهم هيقدموني بطريقة كويسة، ولما بعتولي الورق، كنت بقرأ دور تاني، غير دور يوسف، كنت هعمل دور ياسر اللي عمله محمود حجازي اللي عمل الدور بطريقة غلسة مكنتش هقدر أعمله بالطريقة دي".

وتابع: "كنت بقرأ دور ياسر، مش بقرأ بقية المسلسل، لقيت الأستاذ صبري سليمان بيكلمني بيقولي إنت بتعمل إيه؟، قولتله: بذاكر، قالي، طيب سيبك من دور ياسر أقرأ دور يوسف، قولتله لأ مش هغير الدور، قالي إنت قرأت المسلسل، لما شفت دور يوسف، لقيته شخصية معقدة، لقيت أن الشخصية دي لو اشتغلت عليه مظبوط هتبين حاجات أنا نفسي المنتجين والمخرجين يشوفوها، يوسف مش شرير عشان شرير، هو تزق عشان يتصرف بطريقة معينة، معندوش ثقة أوي في نفسه، شكاك، رد فعله أوفر، أنا قفلت على نفسي 3 شهور، الورق جالي أواخر شهر 12، مراتي وولادي كانوا في لبنان، فكان عندي فرصة أركز مع نفسي".

ولفت، إلى أنه يحب تجهيز مشاهده قبلها بأسبوع، وأضاف: "أنا كنت رايح الغردقة هصور مشهدين، فقعدنا شوية مع الشباب، فواحد منهم كان عايز حاجة من عندي، فلقى على السرير 15 سكريبت، بيقولي إيه ده، قولتله، المشاهد اللي هصورها الأسبوع، بيقولي هتجهزهم دلوقتي، قولتله اه، أصل انا العربي تبعي مكانش أحسن حاجة، فبعمل لود عشان أذاكر أكتر".

مسلسل "يوتيرن" بطولة النجوم: ريهام حجاج، نورهان، توفيق عبد الحميد، عبير صبري، كريم قاسم، محمود حجازي، وصفاء الطوخي وغيرهم، للكاتب أيمن سلامة، وإخراج سامح عبد العزيز، من إنتاج شركة "العدل جروب.