أحمد سعد: "أنا مُسجل علاقات.. ورامز جلال رماني من ارتفاع 10 أمتار"

كتبت- منى الموجي:

حل الفنان أحمد سعد ضيفا، على برنامج تفاعلكم المعروض على قناة العربية، مساء أمس، وتحدث خلال الحلقة عن أعماله الرمضانية، وحياته الخاصة.

في البداية كشف سعد أنه حتى اللحظة التي يُجري فيها اللقاء لم يُصب بفيروس كورونا.

وعن إطلاق لقب "ملك التترات" عليه، قال "شكرا ملك التترات لقب جميل، أنا بحب التترات وبعملها كويس، المرحوم عمار الشريعي كان أول حد اشتغلت معاه تتر، قالي ان أغاني التترات لازم أعرف قصة الموضوع وأبعاد شخصية البطل ايه، ويمكن ده خلاني متميز شوية".

وعن مشاركته في تترات رمضان 2021، قال "الاختيار 2 مختلف لأنه مش قصة اسطورية لا حقيقية، ناس ماتت وضحت بحياتها عشاني أنا شخصيا، حسيت ان عندي مسؤولية إن امهات كتير بتسمعني فقدت أولادها وأسر شهداء، هل هعبر عنهم وأقول كلمة تقويهم وتساعدهم وتواسيهم، قعدت كذا مرة اروح الاستديو اغني وأقول لسه لحد ما طلع بشكل مناسب".

وعن عدم تقديمه تتر مسلسل ملوك الجدعنة الذي يلعب بطولته شقيقه الفنان عمرو سعد، أوضح "أنا مرتبط بعمرو نفسيا مش فنيا بس، بعرف اتفاهم معاه لانه في نفس الوسط وبسأله في كل حاجة، واللي عامل الموسيقى العظيم الموسيقار ياسر عبدالرحمن، فيه مفاجأة هعمل معاه أغنية داخل المسلسل".

ونفى سعد معرفته بمقلب الفنان رامز جلال قبل التصوير، وأكد "والله أبدا مكنتش عارف، جاتلي الدعوة من موسم الرياض والهيئة العامة للترفيه، وعارف ان رامز بيصور في دبي، وكنا في وقت كورونا شبه اتعملنا حجر مش عارفين مين شغال مين كرو لمدة يوم، ورحنا نصور ابتديت أحس ان فيه حاجة بس مش فاهم ايه الموضوع، الارتفاع كان كبير 10 متر رماني من فوق عمارة 4 أدوار تقريبا".

وتعليقا على اهتمام وسائل الإعلام ومواقع التواصل الاجتماعي بحياته الشخصية، قال ضاحكا "أنا مسجل علاقات، مطلوب بسبب العلاقات في كل الأقسام، لكن هي تجارب في الحياة الناس بتشوف النتيجة من غير ما تعرف الحقيقة".

وتعليقا على صدور حكم لصالح طليقته الفنانة سمية الخشاب بتغريمه 500 ألف جنيه، قال "القضايا بيحكم فيها القضاء وهو نزيه وعادل، مقدرش اقول حاجة، فيه محامي بيتكلم في الموضوع والحاجات دي قديمة انا دلوقتي مش بحب المشاكل".

أحمد سعد غنى في رمضان 2021، تتر مسلسل الاختيار 2 بطولة كريم عبدالعزيز وأحمد مكي، ومسلسل "ضل راجل" بطولة ياسر جلال ونور ونرمين الفقي.