استشاري تغذية: ممكن تدخل المستشفى بسبب رغيف حواوشي ثمنه 5 جنيهات

كتب- معتز عباس:

قالت الدكتورة نهلة عبدالوهاب استشاري التغذية، إن هناك مخاطر تصيب الإنسان من رغيف الحواوشي رخيص الثمن.

وأضافت "عبدالوهاب"، في مداخلة هاتفية لبرنامج "التاسعة"، المذاع على الفضائية الأولى المصرية، اليوم الاثنين، أنه بدلًا من شراء رغيف حواوشي ثمنه 5 جنيهات مجهول المصدر، اللحوم منتشرة في جميع فروع ومنافذ القوات المسلحة مضمونة وممتازة وسعرها معقول.

ونجيب نص كيلو لحمة ونعمله في البيت بدل ما اشتري 4 أرغفة حواوشي بـ20 جنيهًا، والقوات المسلحة بتبيع لحمة مضمونة وممتاز وسعرها معقول، متابعة: "في كمان بروتين نباتي في أكلات مختلفة لو محدش معاه ميزانية، لكن لا يجب شراء رغيف حواوشي مش عارفين مصدرة إيه".

وتساءلت، قائلة: "إزاي كيلو اللحمة ثمنه 100 جنيه ورغيف الحواوشي ثمنه 5 جنيه؟!"، مضيفة: "بعض المحلات بتحط توابل كثيرة عشان تغطي على الطعم والريحة، وفي مطاعم بتعمل بقايا لحمة أحيانًا مش بتبقى سليمة، وتسبب تسممًا غذائيًا".

وأكدت، قائلة: "إحنا في وقت فيروس كورونا لازم نحافظ على المناعة، ومفيش داعي لأكل الشارع اللي مش مضمون، اللي منعرفوش منكولهوش، لأنك كدا تأذي نفسك وممكن تحجز في المستشفى قصاد 5 جنيه ثمن رغيف حواوشي".