ياسمين صبري: "كنت عايزة أبقى مذيعة ومش باخد حاجة على أعصابي"

تحدثت الفنانة ياسمين صبري عن السبب وراء دخولها الفن، وأنها كانت تتمنى أن تصبح مذيعة ولكن شاء القدر أن تصبح ممثلة، وذلك خلال وجودها ضيفة على بودكاست "موعد مع لميس" تقديم الإعلامية لميس الحديدي والمذاع على موقع "مصراوي".

سبب دخول ياسمين صبري عالم الفن

وقالت ياسمين: "دخولي الفن كان صدفة، أنا كنت عايزة أبقى مذيعة يا لميس زيك كده، أنا بسأل كتير أوي، أنا شخصية فضولية في الحياة، يعني لو قاعد جانبي دكتور أقوله ده بقى بيتعرف إزاي؟ وده بيتعامل إزاي؟ وهنا بقى ساعتها بتعمل إيه؟ وأنت لما بتصحى الصبح بتعمل إيه الصبح؟ وبتصحى الساعة كام ويومك عامل إيه".

وتابعت: "أنا من الناس اللي أحب أقشر البني آدمين لإننا طبقات كتيرة، عندنا الوش الخارجي الاجتماعي ده اللي بنلبسه، وفيه الوش العاطفي اللي الناس القريبة منا اللي بتلمسه، وفيه الوش الأعمق اللي بينك وبين نفسك وفيه الوش الحقيقي اللي جوه اللي بينك وبين الله، فأنا بحب أقشر الناس، فكنت نفسي أبقى مذيعة أصلاً".

وكشفت عن تفكيرها في الاشتراك في "ميس إيجيبت" مسابقة لاختيار ملكة جمال مصر، اعتقادا منها أن هذه الخطوة سوف تكون البوابة لعالم تقديم البرامج، موضحة "قلت أهو يمكن أوصل لحاجة يعني شيء يوصل إلى شيء، وكنت معتمدة على ذكائي في اختياراتي، فقولت هخش ميس إيجيبت وأنا اللي هختار بقى يعني هيجيلي حاجات أقول لأ أروح في السكة اللي عايزة أوصلها، ولكن ما تمتش موضوع ميس إيجيبت ده أصلاً وده الحمد لله لمصلحتي، وبعد كده قالولي لازم تمثلي قولتلهم أمثل أبداً مستحيل وبعد كده مثلت لقيت الموضوع حسب أنتي تصدري إيه عن نفسك، وبناءً على اللي أنتي بتصدريه هو ده اللي هيرجعلك زي صدى الصوت كده، وهي الحياة كلها كده".

ياسمين صبري: مش باخد حاجة على أعصابي

وردا على من اعتبرها في البداية مجرد وجه جميل، قالت "عادي عادي في البداية، بس هو الإنسان عبارة عن إصرار، وفكرة بتعملي إيه كل يوم، بتقولي إيه عن نفسك كل يوم".

وسألتها لميس "هل أنتي كنتي بتصحي تقولي لأ خلاص أنا هبقى ممثلة وهبقى ممثلة كويسة فتذاكري؟"، لتعلق: لأ لأ.. أبداً أبداً.. بصراحة يعني أنا إنسانة واخدة الأمور بسلاسة وببساطة ومش باخد الدنيا على قلبي وما باخدش حاجة على أعصابي، أنا بفضل الله كانت خطواتي سريعة، أول مسلسل عملته في حياتي كان مع أستاذ محمود عبدالعزيز، أول حاجة عملتها مسلسل في حياتي كان رمضان وحواليا نجوم، مع أستاذ عادل أديب ووفاء عامر وكلهم نجوم".

اقرأ أيضا:

تعليقات الجمهور على فيديو احتفال طرابزون سبور بـ محمد صلاح: "استقبال أسطوري"

عمرو دياب يتربع على صدارة يوتيوب وكايروكي ينافسه بـ "سوبر نوفا"

مهرجان الجونة السينمائي يعلن عن شراكة مع مهرجان زيوريخ السينمائي