أمير مرتضى منصور: "متعلق لي ورقة مدخلش نادي الزمالك"

حل أمير مرتضى منصور المشرف السابق على الكرة بنادي الزمالك، ضيفًا على برنامج "أسرار" تقديم أمير بدر ويعرض يوميًا طوال شهر رمضان على قناة "النهار".

وتحدث "أمير" عن كواليس خروجه من نادي الزمالك، وعن مشاكل تعاقدات اللاعبين خلال الفترة الماضية، إلى جانب قضية لاعب النادي الأهلي محمود كهربا.

وتحدث أمير مرتضى منصور، المشرف السابق على الكرة بنادي الزمالك، عن سبب منصبه في نادي الزمالك قائلًا: "انا طيب وشرير في نفس الوقت وبيطلع ده مع اللي يستحق، موضوع اني كنت ظابط او محامي وماليش علاقة بالكورة ده موجود في كل العالم، وعندنا معظم اللي بيلعب كورة مبيهتموش بالدراسة، وده هنا وبرا مصر، والاساطير كلها كده، امثلة محمد صلاح وكريستيانو مثلًا، دول مانعرفش خريجين ايه، لكن أساطير في مجالهم، ومفروض يكون فيه حد متعلم كويس يدير، وهتلاقي المعادلة دي موجودة اوي في الهاند بول، معظمهم خريجي هندسة وطب".

واستكمل أمير مرتضى: "الكورة بقى هي اللي بتاخد من التعليم، وأنا كنت من ناشئين الزمالك ونفس جيل شيكابالا، وكنت لاعب شاطر، لكن كان عليا ضغوطات كبيرة، وده بسبب ان والدي كان نائب رئيس الزمالك، وده كان ضغط عليا لان الكل عارف ان ابويا رقم 2 في النادي، وكنت هتعامل معاملة خاصة سواء ايجابية او سلبية، وده أثر عليا".

وأضاف أمير مرتضى قائلًا: "وأنا في قطاع الناشئين كان مجلس الإدارة بيتحل، ودلوقتي متعلق لي ورقة اني ما دخلش النادي، وكتير عملوها، وبيحصل ده عشان اللي كان في الإدارة سابقاً بيبقى له شعبية وجماهيرية ف ميرجعش تاني، واحنا موجودين عملنا كده بس بإجراءات قانونية، وانا في النادي مكنتش معنى بقصة الانتخابات ودايمًا كنت احب ابعد عن الحتة الاجتماعية، لاني عارف ان في يوم من الايام هتحط فيها سواء انتخابات أو منصب في النادي، وساعتها انا كنت معني أكتر بالكورة".

اقرأ أيضا:

50 صورة من حفلات سحور النجوم.. مي عمر وبسمة بوسيل ويسرا الأبرز

"مش هنرجع تاني أبدًا".. هشام ماجد يكشف سبب انفصاله عن أحمد فهمي