أشرف زكي: نساعد الفنانين عن طريق جروب.. ودنيا سمير غانم ساعدت في عز أزمتها

كتب- وائل توفيق:

قال الفنان الدكتور أشرف زكي، نقيب المهن التمثيلية، أن الفنانين دشنوا جروب بعنوان "ساعدوا زملاءكوا" على "واتس آب" لعمل الخير وتقديم المساعدات الإنسانية.

وقال زكي، أثناء استضافته في برنامج "العرافة" عبر قناة "المحور": "في ناس حابة متكونش في الجروب عشان بتعمل في الخفاء، بعتذر إن ممكن أنسى بعض الأسماء، أو أقول أسماء ممكن متكونش حابة تقول اسمها، شيكو، هشام ماجد، مصطفى خاطر، صابرين، ريهام حجاج دي شايلاني جامد شوية، هي تزعل إني قولت اسمها، ودنيا سمير غانم في عز معاناتها ما بتتأخر، إدوارد، أعد خمسين واحد، مبيتأخروش".

وتابع: "بكتب على الجروب اللي هو بتاع ساعدوا زملاءكوا، ومش من حق يتكلم باسم النقابة غيري، أنا أو مجلس الإدارة، أي زميل سواء كان عضو نقابة، أو حتى ينتسب، إحنا مبنقولش إحنا بنعمل إيه، نجيب منين، ده شغلنا، لو في زميل هيعمل عمليه هتكلف مليون جنيه، ده موضوعنا إحنا، النقابة هتساهم بإيه، النقابة هتساهم بعشرين ألف جنيه، البقية الزملاء بقى".

وأكد على أن نقابة المهن التمثيلة تكفل أعضائها، والكثير من غير أعضائها، طالما ينتسبوا للأسرة الفنية.

وتقدم الإعلامية بسمة وهبة برنامجها "العرافة" في موسمه الثاني، يوميا على شاشة "المحور" في رمضان 2202.