"أنا حرة في رأيي".. دينا المصري تكشف كواليس أزمة الأذان والمنشور المسيء

كشفت دينا المصري، مقدمة برنامج "حواديت على المكشوف" بقناة "المحور"، كواليس قرار إيقافها عن العمل، بسبب اعتراضها على خفض صوت الأذان في المسجد الموجود بالكمبوند الذي تقيم فيه، بجانب الإساءة في تعليق آخر للأخوة المسيحيين.

دينا المصري تكشف كواليس جديدة من أزمتها بسبب "الأذان"

أكدت دينا المصري أن إدارة القناة التي تعمل بها قررت إنهاء التعاقد معها، عقب الأزمة التي أثارتها تدوينتها بشأن الأذان، وما تبع ذلك من حالة جدل واسعة على مواقع التواصل الاجتماعي.

وأوضحت أنها رفضت قرار خفض صوت الأذان في المسجد القريب من منزلها بحي الأشجار، مؤكدة أنها تعيش في المنزل منذ 8 سنوات، وكانت تسمع الأذان طوال هذه الفترة، قائلة: "نشرت تدوينة عبرت خلالها عن رفضي للقرار".

وأضافت: "قلت إن أنا رافضة القرار ده، يعني إيه أذان يتمنع تحت بيتي وما أسمعوش؟! والله أنا حرة في رأيي".

وتابعت: "أنا ساكنة في حي الأشجار، وبيتي جنب الجامع، وبقالي 8 سنين وأنا في البيت ده بسمع الأذان، ويمكن دي أحلى حاجة بسمعها في بيتي، وزي ما بسمع الأذان، زي ما بسمع برضه في حفلات بتحصل تحت البيت في كل مناسبة، سواء في عيد، ولا في رمضان، ولا في أي مناسبة عادية طبيعية، وبيحصل فيه حفلات، وتجمعات، ومسرح، وباند، وكمانجة، وعود، وطبلة، ودي جيه".

وواصلت: "كل الحاجات دي بتحصل وبتزعجنا، أهو ده الإزعاج، لما مبعرفش أنام مثلًا، مبعرفش أذاكر، مبعرفش أعمل أي حاجة، بس بعديها وأقول: معلش خليهم ينبسطوا هما مش بينبسطوا كل يوم، وبنعدي الإزعاج ده، هو ده الإزعاج.. نيجي بقى عند الأذان، وحد يعمل شكوى في أذان ربنا ويقول: أصله بيزعجني، أصله عاملي إزعاج، وطوّا الصوت شوية أصل في ناس مريضة".

دينا المصري: ناس بتقول إللي عايز يصلي من غير أذان

أردفت: "أنا لا محجبة، ولا أنا حد ملتزم دينيًا والكلام ده كله، أنا واحدة عادية جدًا عايشة حياتي عادي جدًا بطبيعتي وبحريتي، اللي أنا بشوفه ومقتنعة بيه بعمله، مع العلم إن أنا مقتنعة جدًا إن الحجاب فريضة وكل الشعائر الدينية دي كلها أنا مقتنعة بيها جدًا ومصدقة عليها.. أصل في ناس بتقولك: اللي عايز يصلي يصلي في أي حتة من غير أذان، ومن غير مش عارف إيه، مش لازم صوت إزعاج".

واستطردت: "تمام، أنا معاكم جدًا، اللي عايز يصلي فعلًا بيصلي في أي حتة ومش لازم يسمع صوت الأذان، ولكن الأذان اتعمل لتوعية حد عاصي، حد زيي مثلًا، حد لسة ملبسش الطرحة، حد لسه مش قريب من ربنا أوي، حد لسه بعيد عن دينه يعتبر، فيفوقه، في وقت من الأوقات قلبه يوجعه، ضميره يأنبه، في لحظة من اللحظات وهو بيسمع صوت الأذان يرجع لبيته ويرجع لبيت ربه فيفوق".

وأضافت: "الأذان اتعمل لتوعية الناس وللاتعاظ وبس، للعظة، يعني عشان نتعظ وإحنا بنسمع الأذان كده في وقت من الأوقات ساعات بيجيلنا وقت نقول يا رب، بنقول يا رب وإحنا بنسمع الأذان ده، أنت حاسس بيا، فبنرجعله، وأنا حقي إن أنا أقبل أو أرفض في الكومباوند اللي أنا ساكنة فيه، في البيت اللي أنا ساكنة فيه، في الشارع، في الحي، في المنطقة اللي أنا فيها، إزاي ما أسمعش صوت الأذان.. وأنا حقي حق الرأي إن أنا أعقب براحتي وبالشكل اللي أنا شايفاه يناسبني".

الإدارة اللي وافقت على القرار ده فاشلة

واصلت: "قلت كالآتي: الإدارة اللي وافقت على القرار ده إدارة فاشلة، تمام؟ واللي سعى في إنه يوصل قرار زي ده إنه يتصدق عليه ويتمنع صوت ربنا من السمع برضه ناس فاشلة.. لكن إزاي؟ أنتم بقى عملتوا نفسكم مش شايفين كلامه، رحتوا ماسكين في الغلطة وافتكرتم إن أنا بعمم، أنا ما بعممش، أنا تلات تربع أصدقائي مسيحيين ومن أديان تانية، وبحبهم جدًا وأصدقائي المسلمين عارفين إن أنا بحب دول أكتر منهم، وبدخل بيوتهم أكتر ما بدخل بيتي، وبيدخلوا بيتي أكتر ما بيدخلوا بيوتهم، وأنا ما عممتش، أنا كلامي كان واضح لإنسان مبيمثلش غير نفسه".

وعلقت دينا المصري، على قرار وقفها عن العمل، قائلة: "فجأة لقيت الدنيا قامت والقناة.. بصوا موضوع وقفي من القناة ده، أنتم لو فاكرين إنه مزعلني، والله أنا أصلًا كنت قربت أمشي والسيزون بتاعي بينتهي خلاص، وقلت هاخد إجازة شهر وكان فاضلي تلات حلقات وهأجز، والموضوع ده لما حصل؛ لأن القناة ناس محترمة وفيهم أصدقائي وناس ما شافوش مني إلا كل خير وأنا ما شفتش منهم إلا كل احترام وكل خير".

واستكملت:"قالولي إن هما محطوطين في موقف وحش ولازم ينزل قرار الوقف وإن هما لازم يوقفوني، قلتلهم: شوفوا شغلكم للآخر، اعملوا اللي أنتم عايزينه وشايفينه صح، أنا معاكم، ده حقكم اضمنوا حقكم واعملوا الصح واحمو نفسكم، وعشان كده لما نزل قرار الوقف أنا أصلًا كنت عارفة بيه قبليها ومزعلتش، ليهم كل الحب، ليهم كل الاحترام".

وقالت دينا المصري: "أنا كل كان يهمني في الليلة دي كلها إن أنا أرجع أسمع صوت الأذان في بيتي تاني حتى لو بصلي سطر وبمشي وأسيب سطر، مش قصتكم دي بتاعتي أنا وربنا وبس، لكن أنا من حقي في كل وقت بصلي ما بصليش أسمع صوت الأذان، وأخيرًا المسلمين والمسيحيين إخوة هيفضلوا إخوة وأنا معممتش غلطي على حد، وغلطي كان واضح الغلط بالغلط، يمكن ده غلط لأن أنا إعلامية المفروض أكون محايدة، يمكن أكون المفروض يكون عندي انضباط شوية في السيطرة على نفسي، ممكن أنتم يكون معكم حق في ده".

اقرأ أيضًا:

طقس 6 أيام.. استمرار ارتفاع درجات الحرارة وشبورة صباحية ونشاط للرياح

ما حالات إعادة توزيع المعاش بين المستحقين؟.. القانون يحسم الجدل

التعليم توجه المديريات بإنهاء تنسيق أولى ابتدائي ورياض الأطفال