من مشاهير البايكرز.. نهى صالح تكشف تفاصيل جديدة عن حادث وفاة شقيقها

أعادت الفنانة الشابة نهى صالح نشر فيديو يكشف تفاصيل حادث وفاة شقيقها خالد أثناء قيادته لدراجته النارية، وذلك عبر صفحاتها الرسمية على مواقع التواصل الاجتماعي.

وكشفت نهى تفاصيل الحادث في تعليقها على الفيديو: "لكل واحد دافع عن العربية بكل ظلم وغلط أخويا وهو مش حاسس بينا الفيديو أهو، كانوا ماشيين على طريق سريع وقدامهم عربية ماشية على الشمال، وهما كانوا يمين وفوقهم كاميرا يعنى مش ماشيين بسرعة، لأن ماشيين بسرعة الرادار وابتدوا يناموا على التانك بتاع البايك وهيهدي السرعة بعد الرادار، علشان ينطلق".

نهى صالح تكشف تفاصيل حادث وفاة شقيقها

وتابعت "فجأة سواق العربية قرر يدي إشارة يمين ويهدي مرة واحدة، علشان يجي من رابع حارة كان ماشي فيها لأول حارة وأول مفرق على إيده اليمين، لأنه كان عايز ياخدها بالعرض، فهما اتخضوا يا حبايب قلبي منه فخبطوا في بعض قدام عين العربية، فعمل إيه السواق كمل طريقه عادي، ولا كأنه عمل حاجة، ما تهزش لحظة للبايك وهي ماسكة فيها النار كمل بكل جحود، ولا كأن حصل حاجة جانبه فيها أرواح ونار".

وأضافت نهى "أحب أقول للسواق إن مش ذنبهم بس اللي في رقبتك ذنب عياله كمان لأنهم شافوا الحادثة بعينيهم، وشافوا أبوهم بعينيهم وهو بيموت وانت مكمل، عادي ده بالنسبالك، أما بالنسبة للي صوّر فده مش لاقية كلام أوصفك بيه إزاى قدرت يا عديم الإنسانية إنك تصور حتى بعد الحادثة بدقيقة، وكملت برضه طريقك عادي، إزاي فضلت ماسك التليفون والنار مولعة في الموتوسيكلات كل ده، علشان عايز تلحق تنزل الفيديو، علشان اللايك والشير والفيو".

نهى صالح تطالب بحق شقيقها

واستكملت موجهة كلامها لمن قام بتصوير الفيديو: "طيب أحب أقولك إن عيال أخويا اللي شافوا الحادثة بعينيهم كانوا ممكن يتخطوا مع الزمن بس الفيديو، اللي حضرتك صورته بيفتحوه كل شوية علشان يشوفوه، فذنبك كبير عند ربك يا عديم الدين والإنسانية، فوضت أمري لله هو حسبي ووكيلي".

وطالبت نهى في ختام منشورها بحق شقيقها "أنا عايزة حق أخويا وأنس من اللي قهر قلبي عليه: العربية واللي ورا الفيديو حتى بعد الحادثة وشاف النار حتى ماساعدهمش، لازم يتحاسبوا دمروني ودمروا عياله ومراته وحياتنا كلها. مش هسيب حق أخويا".

وفاة شقيق نهى صالح

نهى أعلنت خبر وفاة شقيقها خالد عبر فيسبوك، ونشرت صورته معلقة "يا حبيبي يا حبيبي يا حبيبي، يا حتة من قلبي يا أخويا الوحيد يا عمري كله، والنبي ما تمشي خليك، ابتلاء والنبي يا رب مش هقدر عليه، والنبي يا رب أنا بحبه ده أخويا الوحيد، يا رب اجعل أسعد أيامه النهاردة".

وتابعت "بحبك بحبك.. أخويا الوحيد بكتبله عزا بإيدي، مع السلامة يا عمري كله، مع السلامة يا خالد يا سيد الرجالة".

اقرأ أيضا

"شرف ولا مقلب".. كيف انتهى الخلاف الشهير بين عبدالحليم حافظ وأم كلثوم؟

تركي آل الشيخ يعلق على الإيرادات التي حققها فيلم 7Dogs في 25 يوما