صور| فكرة بسيطة رجعت طعم زمان.. مبادرة للإفطار الجماعي في دمنهور

البحيرة - أحمد نصرة:

على كورنيش مدينة دمنهور، بمحافظة البحيرة، اجتمع المئات من الأسر والأفراد للإفطار على مائدة رمضانية واحدة دعت إليها إحدى المبادرات على صفحات التواصل الاجتماعي، فكرة حظيت بقبول ومشاركة الكثيرين، ونجحت في إضفاء أجواء من البهجة والسعادة على الحضور.

يقول محمد فهمي صاحب المبادرة: "الإفطار الجماعي بدأ بفكرة بسيطة اقترحناها وقابلت إعجاب كبير من أعضاء جروب، دمنهور لايف، وفعلا كانوا محتاجين لمة رمضان زي زمان اللي اختفت بشكل كبير، وبالفعل اعلننا عن الفطار وكان بمقابل مادي بسيط بسعر التكلفة، وبالمجان لغير القادرين، ودعونا جمعيات خيرية للمشاركة والتنظيم، ودعونا أهلنا ف دار المسنين عشان يفرحوا معانا والاقبال كان كبير جدا فوق المتوقع.

هادي إدريس مسؤول جمعية إنقاذ طفل بالبحيرة قال: "بفضل الله الإفطار الجماعي بالأمس حضره المئات من أهل دمنهور وكان دورنا كمجموعة شباب من مسئولي جروب دمنهور لايف وجمعيتين هما جمعية إنقاذ طفل من حقه يعيش ورسالة دمنهور وبعض الرعاة، إننا نجهز الوجبات في هذا اليوم، وتجهيز المكان على كورنيش دمنهور بالشكل اللائق وكان أفضل مما توقعنا ومردوده كان سعادتنا جميعاً".

وأضاف محمد مأمون، مصور فوتوغرافي: "الإفطار كان فكرته جميلة جداً باعتباره أول حاجة من نوعها في دمنهور قام عليها هذا الكم من الشباب المتطوع، فكرنا بأيام غايبة من سنين، وأنا كنت حريص من يوم ما تم نشر الدعوة إني أشارك في اليوم كمصور وتوثيق اليوم واللحظات السعيدة فيه".

منى حمادة إحدى المشاركات قال: "كل الشكر للمنظمين قاموا على العمل ومنهم من لم يتناول طعام الإفطار غير بعد التأكد أن الجميع أفطر، وكل الشكر للقائمين على الفكرة الجميلة ونتمنى تبقى عادة سنوية تبدأ من الآن وتستمر".

وقالت نور: "أنا شاركت الحمد لله في الإفطار، ترددت في البداية لكن كنت هخسر كتير لو ما شاركتش، أولادي فرحوا كتير ووصل ليهم إحساس مختلف بلمة رمضان، شكرًا لكل القائمين على اليوم".

وقال محمد رجب: "أفضل حاجة في الإفطار ده إنه جمع الناس وكل الأذواق، المنظمين وفروا وجبات بأسعار التكلفة، واللي كان يحب يجيب أكله معاه من بيته مفيش مشكلة، وناس جابت أكل بزيادة وعزمت على الموجودين، كانت حاجة تفرح ورجعت طعم وفرحة رمضان بتاعة زمان".