إلهام شاهين
تابعنا على
تحدثت الفنانة إلهام شاهين عن جوانب مختلفة في حياتها الفنية والشخصية، مؤكدة أن النجمة والإنسانة بداخلها لا يمكن فصلهما عن بعضهما البعض.
وقالت إلهام شاهين، خلال استضافتها ببرنامج "بين السطور"، على قناة "تن": هما الاتنين ما ينفصلوش عن بعض.. يعني الاتنين أخدوا من بعض.. يعني إلهام (الإنسانة) علمت في (الفنانة)، والفنانة أنا اتعلمت منها حاجات كتيرة أوي".
خبرات حياتية
وأضافت، ردًا على سؤال حول ما تعلمته من الفنانة بداخلها: "الحياة اللي هي عاشتها.. ما أنا بعيش حياة شخصيات عديدة جدًا بكل تجاربهم، بتديني أنا خبرات كإلهام الإنسانة.. خبرات حياتية.. يعني شفت ناس وحياة وأماكن صعب إن أنا كنت لوحدي أقدر أشوفها.. وعشت حياتهم فعلاً".
وتحدثت إلهام شاهين، عن أبرز مميزاتها وعيوبها، قائلة: "مميزاتي إني إنسانة صادقة جدًا، وعيوبي إني إنسانة صادقة جدًا".
وأوضحت: "طبعًا.. هي ميزة لبعض الناس إني صادقة، أنا مريحة أوي في التعامل لأنهم عارفين، لو بينت إني بحبك يبقى أنا فعلاً بحبك، ما فيهاش أي نوع من المجاملة أو النفاق.. يعني أنا واضحة جدًا.. صراحتي ممكن تزعج ناس ويعتبروا إن الصراحة دي فيها جرح لأفكارهم".
الندم
وقالت إلهام شاهين، ردا على سؤال هل ندمت على تقديم أي دور: "ندم؟ لا أنا ما ندمتش على أي أدوار.. أنا أكره أدوار.. يعني أقول الدور ده مكروه، ولازم أوصل الكره ده للناس، لازم الناس تكرهه".
وتابعت: "حقيقي ما فيش، لأ خالص.. أصل كل دور فيه حاجات علامات مهمة، وفيه حاجات مرت عادي.. اللي مرت عادي ممكن أقول هي ما كانش ليها لازمة طالما إنها ما عملتش أثر كبير، ودي بتبقى في البدايات اللي هي فترة الانتشار.. لكن أنا مجتهدة جداً في التنويع في أدواري، إني ما أبقاش ثابتة عند شخصية واحدة معينة، وبتعب أوي في شغلي، فكل دور أخد مني ومن مجهودي ومن أعصابي ومن دراستي ليه، فكلهم بحبهم".
اختفاء الأضواء
وتحدثت "شاهين"، عن تفكيرها في اليوم الذي قد تختفي فيه الأضواء، قائلة: "ما هي لازم تروح أو تختفي، مش ممكن تقعد طول العمر".
وأضافت: "بصي ما إحنا شفنا تجارب اللي قبلنا، فأكيد عرفنا ومش هنتفاجئ.. يعني أنا مؤهلة إن أنا في مرحلة خلاص هبطل.. أنا في سنين في بدايتي كان عندي مثلاً 10 أفلام في السنة… لكن أنا عملت 101 فيلم.. اشتغلت كتير أوي في الأول وبعدين دلوقتي ممكن أعمل فيلم كل 3 سنين، كل 4 سنين.. فخلاص أنا عارفة إن دي مرحلة لازم تيجي".
وأكدت أنها لم تصل بعد إلى مرحلة التوقف، قائلة: "لا لسه.. لو وصلت لها هوقف شغل.. أنا لسه ما وقفتش شغل".
وأكدت تصالحها مع المراحل العمرية: "متصالحة جدًا.. أنا أول واحدة بدأت أعمال أكبر من عمري بكتير".
وتحدثت عن نظرتها لتقدم العمر قائلة: "ساعات الواحد يبص في المراية ويتضايق.. ده طبيعي إن أي ست تفكر بالطريقة دي سواء فنانة أو غير فنانة.. لكن مش مضايقني يعني مش هاجس".
فقدان الوزن
وقالت فيما يتعلق بفقدان الوزن: "رجعت تخنت تاني أهو باين قدام المراية.. أنا زايدة دلوقتي عن لما نزلت أوي، زايدة بتاع 5 كيلو أو 6 كيلو.. لأن وقفت شوية ريجيم تعبت من الريجيم ومن أدوية التخسيس".
ووجهت إلهام شاهين رسالة إلى نفسها في الصغر، قائلة: "إلهام شاهين الصغيرة أصلها كانت انطوائية أوي.. فهقول لها إن هي كانت صعبانة عليا… فكي شوية.. المفروض في سنك الصغير تنطلقي تلعبي مع أصحابك تنبسطي بحياتك… الحياة مش وحدة ومذاكرة وخلاص".
إلهام شاهين شاركت في رمضان 2025 بمسلسل سيد الناس إخراج محمد سامي، بطولة عمرو سعد، وتغيب هذا العام عن السباق الرمضاني.
اقرأ أيضًا:
"سنيد تهزيق ومعلش ماتعيطيش".. أزمة بين "البلوجرز" بسبب رامز جلال
"زغردت لما اتأجل".. سوسن بدر تكشف كواليس أصعب مشهد في "الست موناليزا"
"إنتي بطلتي السنة الجاية".. يارا السكري تفجر مفاجأة عن أحمد العوضي
