انتهاء تصوير مسلسل "حد أقصى".. أول تعليق من روجينا

أعلنت الفنانة روجينا، انتهائها من تصوير مسلسل "حد أقصى" بشكل نهائي والذي تنافس من خلاله في موسم دارما رمضان 2026.

روجينا تعلق على انتهاء تصوير حد أقصى

وكتبت روجينا عبر حسابها على إنستجرام: "الحمد والشكر لله فركش مسلسل حد أقصى، النهاردة مش هتكلم على اني ممثلة في هذا العمل وأشكر كل الناس أمام الكاميرا وخلفها وأشكرك المؤلف والمخرجة زي كل بوست بكتبة في نهاية أي عمل ليا، انا النهاردة هتكلم كم أنا فخورة كل الفخر اني عرفت اربي بنت اسمها مايا أشرف زكي، كنت باخدها وهى عندها ٦شهور وأنا في البروفات بقيس ملابس في فيلم المصير، لغاية ما شوفتها مخرجة الصغير قبل الكبير في اللوكيشن بيحبها وبيحترمها بيقدرها لأنها بتحب كل الناس ما هم اخواتها وعشان كدا الحمد والشكر لله عمري ما اشتغلت في عمل فيه كل الحب ده فيه خوف من الكل على المسلسل عشان بيحبوا مايا، كانوا بيوصلوا الليل بالنهار عشان ده مشروعهم وعايزين مايا تنجح وتكسر الدنيا بشكركم كنتوا نعم السند".

وتابعت: "بدعيلك يا بنتي من قلبي يحبب فيكي خلقه على قد طيبة قلبك ونيتك الصافية واحترامك وتقديرك لكل اللي حواليكي، وانتي تعبتي انتي وكل فريقك بحب، مكنتيش بتنامي ساعتين في اليوم".

وأضافت: "الحمد والشكر لله، لكل مجتهد نصيب، كل كلمة بتتكتب عنك شكر فيكي قلبي بيبقى فرحان ما هى حتة من قلبي وعمري، ربنا يفرح كل ام بأولادها، ربنا يسعدك ويوفقك ويراضي قلبك بنجاح ومحبة يتعجب منها أهل السموات والأرض، قلبي راضي عنك ارضى عنها يا رب" .

روجينا تشيد بصناع حد أقصى

وفي تدوينة أخرى، نشرت روجينا، صورة من الكواليس تجمعها مع زوجها وابنتها مايا زكي، عبر حسابها على إنستجرام، وعلقت: "الحمد والشكر لله صورة من أول في بداية حلم حد أقصى، شكرا أستاذ هاني يسري على المجهود والحب للمشروع وإيمانك بمايا وايمانك بحلمها من أول البداية معاك وفرحتك بيها وهى بتخرج لأول مرة عارفة انها بنتك اللي اتربت على إيدك بجد شكرا".

وتابعت: "الأستاذ محمود عوف أشطر وأجدع وأقوى وأحسن منتج فني، دايما في ضهر مايا، أنا مبهورة بيك إزاي عندنا شباب بالقوة والحكمة والإدارة دي انت اخويا".

وأضافت: "الشريك الثالث ابني مصطفى الصاوي، أقولها بمنتهى القوة أشطر مدير تصوير مجتهد شاطر مركز دايما على وشك ابتسامة برغم التعب والله يا بني متربي أحسن تربية سواء في المعهد العالي للسينما أو على إيد أخويا وعشرة عمري محمد الصاوي، كنتوا نعم السند لمايا ولمسلسل حد أقصى بمنتهى الحب والايمان والصدق، أشكركم جدا".

مسلسل "حد أقصى" بطولة روجينا، محمد القس، خالد كمال، فدوى عابد، بسنت أبو باشا، ومن إخراج مايا أشرف زكي.