"مكنتش عايزة أعمل المشاهد دي في رمضان".. ميار الببلاوي إيناس الدغيدي السبب

قالت الفنانة ميار الببلاوي إن المخرجة إيناس الدغيدي ضغطت على لتنفيذ بعض مشاهدها في فيلم "ديسكو ديسكو" في نهار رمضان، هو ما كنت ترفضه بسبب صيامها.

وتحدثت خلال لقائها ببرنامج "العرافة": "أنا مكنتش عايزة أعمل كل المشاهد دي في فيلم "ديسكو ديسكو"، مشاهد كتير مكنتش عايزها ولا كنت عايزة ألبس مايوه، ولا أعمل مشهد شريف منير، المشاهد دي عملتلي مشاكل، لكن الحمد لله اتحجبت و مش عايزة حاجة من دي تتعرض".

وتابعت: "المشهد ده ميصحش، ولا يليق برمضان، كان عندي 19 سنة، وفرحانة أني دخلت التمثيل، وبشتغل قدام نجلاء فتحي وصلاح ذو الفقار، أنا كنت مطيعة جدا، وكنت حابة الموضوع، بس المشهد ده مينفعش، أنا متربية في بيت متدين".

وأضافت: "دخلت علشان أعمل المشهد ده، قولتلهم نعمله بعد الفطار، إحنا كنا بنصور في الديسكو أنا وأختي الوحيدين اللي كنا صايمين".

واستكملت: "أستاذة إيناس طبعا اتعصبت، والدنيا اتقلبت، قالتلي إنتي هتقعدينا ساعتين لحد الفطار علشان تطلعي تعملي المشهد، جت أستاذة نجلاء أقنعتني إني أعمل المشهد وقالتلي اعملي المشهد، وقالتلي رمضان ده أحنا مبنكلش فيه علشان نبقى زي الفقراء ونحس بيهم، الموضوع مش مستاهل كل ده".

يعرض برنامج "العرافة" الساعة 6 مساءً على قناتي المحور والنهار والإعادة الساعة 3 فجرًا و4 عصرًا.