"شهادتي مجروحة".. تامر حبيب يوجه رسالة لصناع مسلسل "كامل العدد +1"
بوستر مسلسل كامل العدد ++1
تطبيق مصراوي
لرؤيــــه أصدق للأحــــداث
كتب - هاني صابر:
وجه السيناريست تامر حبيب، رسالة لصناع مسلسل "كامل العدد +1"بعد عرض الحلقة الأخيرة من العمل.
وكتب حبيب، عبر حسابه على إنستجرام: "شهادتي مجروحة علشان كاتبتي هذا المسلسل هم بناتي وصاحباتي وزميلاتي وفلذات أكبادي، رنا أبو الريش ويسر طاهر، أنا شديد الفخر وشديد السعادة.. انتوا اختارتم من الجزء الأول ومع سبق الإصرار إنكم تعملوا الموضوع ده، واختياركم كان ينم على منتهى الذكاء علشان اختارتم موضوع شبهكم، شخصيات من عوالمكم، وعلاقات عارفينها كويس وقادرين تتكلموا عنها بتفاصيلها ومواقفها وصراعاتها".
وتابع: "عملتوا كده وكتبتوا مسلسل ممتع وشيق وحقيقي وطيب، و طيب دي نحط تحتها ميت سطر، طيب وسط غابة من مسلسلات الدم والمغامرات والعلاقات المشوهة بين الحبايب وبين الأخوات والأهل وبين الصحاب والقرب والغرب.. مسلسل طيب في دنيا كلنا واخدين على خاطرنا منها ومش مآمنينلها، ونجحتوا في ده جدا السنة اللي فاتت، ويمكن مكنتوش ناويين تعملوا جزء تاني أو يمكن كنتوا ناويين، بصراحة مش عارف ومش هأفتي".
واستكمل: "أضف إلى ذلك أن الغالبية العظمى من الأعمال اللي بيتعمل منها جزء تاني، بيكون جزئها الأول أقوى وأحلى، وهنا حدث الاستثناء، ذكائكم وصدقكم وموهبتكم في اللي انتوا كاتبينه السنة دي ربطتنا كمشاهدين وحببتنا في الشبكة الطيبة المبهجة الممتعة دي أكثر و أكثر، أنا شخصياً ومن أول حلقة ماتش الكورة لقيت روحي عايز ألحق أخطفني كرسي وسط العيلة الحلوة دي وأتفرج معاهم على الماتش ، و دموعي فاجئتني وفرحت كأني بجد واحد منهم".
وأوضح: "كل واحد في الناس دول بقي يخصني، وكل شاب وشابة وطفل وطفلة بقوا ولادي، بقيت عايز أساعد في حل مشاكلهم، وخايف على الولاد زي ليلى وأحمد بالظبط وشايل همهم.. عيلة كامل العدد بقت عيلتي بجد علشان العيلة دي هي فعلاً عائلاتنا كلنا أيام ما معنى العيلة كان موجود ومهم، ويا رب كل اللي اتفرج يبقى افتكر وفهم وقدر المعنى ده، وفرحت أوي وأنا بأتلخبط وأنا بأتفرج ومش فاكر مين ولاد مين و لا مين أخوات مين.. يا رنا و يا يسر و يا خالد يا خلفاوي يا إنسان".
وأضاف: "ما أظنش إن أي حد فينا مكنش جعان ونس ودفا وطيبة لقيناهم عندكم، وعمرنا ما هانشبع منهم أبدا، وأكيد كل فرد من أفراد العيلة دي هم وقرايبهم وأصحابهم وحبايبهم وحبايب صحابهم ليه دور عظيم ما يقلش عن دور الثاني في احساسنا بالونس ده، أنا لسه ما شوفتش آخر حلقة، قاصد أأجل آخر قعدة معاكم اللي بعدها علطول هأفضل مستنيكم لغاية ما ترجعولي السيزون الجاي".
مسلسل "كامل العدد + 1" بطولة دينا الشربيني وشريف سلامة، مع ظهور خاص للنجمة إسعاد يونس، كما يشارك في بطولته صدقي صخر، جيهان الشماشرجي، ميمي جمال، أحمد كمال، تميم عبده، ألفت إمام.
View this post on Instagram
اقرأ أيضا:
فيديو قد يعجبك:
