إعلان

هالة صدقي عن شخصية "صفصف " في مسلسل "جعفر العمدة": "نرجسية وشعنونة"

10:02 م الأربعاء 29 مارس 2023
هالة صدقي عن شخصية "صفصف " في مسلسل "جعفر العمدة":  "نرجسية وشعنونة"

كتب- محمد أبوالمجد:

كشفت الفنانة هالة صدقي، تفاصيل دورها في مسلسل "جعفر العمدة"، والذي يعرض خلال شهر رمضان، قائلة: "شخصية صفصف نرجسية شعنونة، تحسي إنها لما فقدت جوزها عبدالجواد حصل لها حاجه وكأنها اتلبست"، مشيرة إلى أن كواليس تصوير المسلسل كانت رائعة، قائلة: "الكواليس كانت عظيمة وكان كل الممثلين حابين بعض وقضينا مع بعض حوالي من 4 إلى 5 أشهر والكواليس كانت لطيفة وإلا مكناش هنستحمل نشتغل من 17 ل 18 ساعة في اليوم".

وأضافت "هالة" في مداخلة هاتفية لبرنامج "التاسعة" على فضائية "مصر الأولى" اليوم الأربعاء: "تعبنا جدًا خلال تصوير المسلسل وكان في استهلاك جسدي جامد لينا كلنا، ويارب مجهودنا يجي بفائدة"، موضحة أن صاحب فكرة وجود صورة جوزي في المسسلسل هو المخرج محمد سامي، قائلة: "الفكرة إن عبدالجواد جوزي كان عايش وموجود دائمًا معايا".

وعن كيفية اختيارها لدور "صفصف" في المسلسل، قالت: "قبل المسلسل كنت بتمنى اشتغل مع محمد سامي عشان أعرف سر نجاح أعماله، واكتشفت أن الممثلين بيحبوا يشتغلوا مع محمد سامي، لأنهم بيبقوا في أحسن حالاتهم معاه وهو كلمني وكنا في الصيف وقالي عندي فكرة لسه مكتبتش بس أنا عمال أفكر في الشخصية مش شايف حد خالص غيرك إنتي، هي أم جعفر وله أخ أكبر".

وتابعت: "كان عندنا مشكلة في السن قولتله شخصيًا معنديش مشكلة خالص وبعدين ممكن المكياج يحل أي مشكلة، واضطرينا لعمل ميك أب لتغير بعض الحاجات في الشكل زي كرمشة عند العين وبعض الحاجات التانية عشان ابني أحمد فهيم في المسلسل ومحمد رمضان يكون لايق إني أمهم".

وأكدت: "في كيميا بيني وبين محمد رمضان قوية جدًا وكنا بندي لبعض في المسلسل، ولسه في مشاهد ماستر سين بيني وبين محمد رمضان حقيقي حلوة وإن شاء الله تعجب الناس"، موضحة: "شخصية صفصف معندهاش فلتر لكنها طيبه ودي طبيعة الست لما بتبقى من غير راجل بتحاول تداري ضعفها بالصوت العالي، وهي أساسًا من حارة وابوها تاجر وجوزها لما مات فضلت واقفه وطبيعة صوتها كده".

وأوضحت: "إحنا خلصنا تصوير الحمدلله ومصدقه صفصف أوي، لأنها تشبه نموذج واحده صاحبتي بنفس التركيبة دي، ومسلسل جعفر العمدة هو المسلسل الوحيد اللي لما بيتعاد ببقى حابه أشوف الحلقة تاني، وللأسف معنديش وقت أتفرج على مسلسلات تانية ومركزة مع جعفر تمامًا".

استطلاع مصراوي

شارك برأيك.. ما هو أفضل مسلسل (15 حلقة) عرض في النصف الأول من شهر رمضان؟

جاوب واكسب مع فوازير مصراوي , للمشاركة أضغط هنا رمضان شهر الخير، تبرع بجزء من مالك لتغيير حياة شخص, للتبرع أضغط هنا

فيديو قد يعجبك: