"أنا مش كيَّاد" و"أحمس" حلمي من الطفولة.. تصريحات محمد رمضان على DMC

كتبت- ياسمين الشرقاوي:

ظهر الفنان محمد رمضان مساء أمس الأحد، مع المذيعة إيمان الحصري ببرنامج مساء dmc، وتطرق خلال اللقاء للعديد من التفاصيل المتعلقة بمسلسله الجديد "موسى"، وحرص على توضيح بعض الأمور للجمهور.

ونستعرض في السطور التالية أبرز تصريحات محمد رمضان في مساء dmc..

- أنتهي من تصوير مسلسل موسى في الخامس من رمضان، إذ استمررنا على نفس الجدية والجهد، أنا معنديش قوانين في التصوير ولازم يكون معايا الـ٣٠ حلقة قبل ما أدخل أصور، وبستغرب إن فيه حد بيصور ومبيبقاش عارف النهاية وتحولات الشخصية.

- اجتمعت مع ناصر عبدالرحمن والمخرج محمد سلامة للحديث عن المسلسل وكيفية اختيار الموضوع والقصة، كنا بنتكلم كل يوم وطرحت سؤالًا بخصوص المقاومة الشعبية ضد الاحتلال ولاقينا إن مفيش حد اتكلم عن دور الصعيد في المقاومة.

- مسلسل موسى به العديد من الخطوط الدرامية ولا يتحدث عن فكرة المقاومة فقط.

- التمساح اللي في المسلسل حقيقي ومش متخدر ولسعني مرة بديله وأنا بطلعه من الماية، ومش هتسجن في المسلسل ده.

- بالنسبة لمشهد موت الحصان الذي ظهر في البرومو الدعائي للمسلسل فهو ليس حقيقيًا، بالمناسبة أنا صورت مشاهد كتير بالحصان بعد تصوير مشهد قتله.

- تعرضت للحرق في جسدي أثناء التصوير وواصلت التصوير، الدكتور وفريق العمل مصدقوش وكملت شغلي الحمد الله ربنا أنعم عليا بنعم لازم أتحمل أي حاجة عشان أحافظ عليها.

- محدش يقدر يحكم عليا بالغرور من غير ما يقابلني، جمهوري اللي قابلني يرد، أنا بفتح حضني ليهم، وعربيتي جمهوري اللي جابهالي ولو غضب عليا يبقى رفدني، ولما بسافر بطيارة خاصة فده عشان أنا نجم مصري، ومصر فوق أي حد في العالم، وأسطول عربيات النجم المصري لا يقل عن أسطول أي نجم في العالم.

- فيديو إلقاء الدولارات في المياه لم يكن سوى مشهد تمثيلي ضمن الكليب الجديد الذي سيعرض قريبًا، مش مطلوب مني تبرير كل مشهد، وتم تصوير هذا الفيديو قبل صدور الحكم القضائي بتغريمي في قضية الطيار.

- أنا مش فنان كيَّاد.. لكن فنان ناجح.

- تمنيت تجسيد شخصية الملك أحمس منذ الطفولة وأثناء تمثيلي على مسرح المدرسة، هو أحمس ده خال الزميل اللي بيعمل المسلسل الموقوف؟