عمرو وهبة عن "رجالة البيت": "حق الناس تزعل وحق اللي متوفقش ياخد فرصة تانية"

كتب- هاني صابر :

كشف الفنان عمرو وهبة، عن رأيه في مسلسل "رجالة البيت" الذي يلعب بطولته أحمد فهمي وأكرم حسني.

وكتب وهبة، عبر حسابه على انستجرام، قائلا" "من حق الناس تعترض وتتريق وتسف، وأنا بدأت اصلاً بفيديوهات تريقة على أعمال وممثلين.. ووالله مش ببرر لحد والحمد لله مش محتاج من حد فيهم حاجة".

وقال عمرو: "محدش طلب منى أدافع، وظروف التصوير وضيق الوقت وكورونا مش مبرر كافي إن عمل يطلع وحش، بدليل إن فيه أعمال تانية طلعت كويسة.. بس الأكيد إن مفيش حد بيبقى عايز يفشل ومفيش حد مش بيتعب.. أحمد فهمي عنده أعمال كتير ناجحة وأكرم حسني عنده أعمال كتير ناجحة وأيمن وتار عنده أعمال كتير ناجحة واستاذ أحمد الجندي أهم مخرج كوميدي في مصر في أخر كام سنة".

وتابع: "لو عمل متوفقش، ده لا ينفي الموهبة بدليل إن بيومي فؤاد اتهاجم فى المسلسل ده والناس أشادت بيه فى مسلسل خيانه عهد .. لو في عمل معجبش معظم الناس وأنا طبعاً منهم بصراحة ده وارد وبيحصل وحصل لناس ورجعوا تاني، ولو محصلش لناس فا أكيد هيحصلهم فى يوم".

وأضاف "عدم التوفيق جزء من الشغلانة، وخصوصاً في حتة الكوميدي اللي هي أصعب حتة، خصوصاً مع شعب دمه خفيف ومش بيضحك بسهولة، وسوشيال ميديا مخلي سقف الضحك يعلى كل يوم.. حق الناس تزعل وحق اللي متوفقش إنه ياخد فرصة تاني طالما ده مش العادي".

مسلسل "رجالة البيت" بطولة: أكرم حسني وأحمد فهمي وبيومي فؤاد وويزو ومن تأليف أيمن وتار وإخراج أحمد الجندي.