ضحية التحرش في البحيرة تروي تفاصيل الواقعة

البحيرة - أحمد نصرة:

أصيبت "إ.غ" 26 عامًا بحرق في ظهرها، فقررت التوجه إلى الصيدلية الموجودة بنفس الشارع الذي تقطن به لشراء علاج، ارتدت عباءتها ونزلت دون أن يدور بخلدها أنها ستصبح محور حديث مواقع التواصل الاجتماعي عقب تعرضها للتحرش على يد شاب وانتشار مقطع فيديو وثقته كاميرا مراقبة للواقعة.

روت الفتاة لمصراوي تفاصيل واقعة التحرش بها: "روحت الصيدلية على أول شارعي كنت لابسة عباية سوداء طويلة وواسعة، وطرحة طويلة ومكنتش حاطه ميك أب، وأنا راجعة دخل من قدامي بس أنا مشفتهوش عشان أنا نظري ضعيف، بعدين رجع لف من ورايا".

وأضافت: "أنا ماشية علي الرصيف ومكنتش قادرة أمشي فعلًا، فجأة سمعت صوت حركة أقدام ماشية ورايا ابتديت أمد في خطوتي لقيت الأقدام اللي ورايا حركتها ابتدت تزيد لحد ما قرب مني ومسكني من منطقة حساسة".

وأكملت: "وقفت قدامه مش قادرة أتحرك ولا أصرخ من الرعب اللي كنت حاساها، وهو كان واقف ساكت وبيعبث في أعضائه التناسلية وبيعض علي شفايفه، و فجأة ابتدى يقرب مني"

"حاولت أبعد بهدوء لاقيته بيشدني، استجمعت قوايا وصرخت فجري عكس اتجاهي، وكان واقف ناس على بعد 10 متر تقريبًا، بس محدش تدخل حتى لما صرخت وهو جري من جنبهم محدش منهم فكر يجري وراه ولا حتى حد فكر ييجي يشوفني".

وعن تفاصيل ما حدث بعد عودتها لمنزلها قالت الفتاة "روحت البيت منهارة مكنتش قادرة أحكي ولا أتكلم أهلي سألوني في إيه حكيتلهم على كل حاجه ووصفتلهم شكله ومحدش عرف يوصل لأي تفاصيل عنه وقالوا قدر الله وما شاء فعل، وهدوني و احتووني لأن أنا ما غلطتش ومكنتش نازلة بلبس ملفت أو بشكل مخل".

وتابعت: "الواقعة كانت يوم 4 فبراير، فجأة من أسبوع لقيت السوشيال ميديا مقلوبة بالفيديو وكل أصحابي بيبعتولي الفيديو وبيقولولي واحدة تانية كمان اتعرضت للتحرش، قلتلهم دي أنا".

وتروي الفتاة تفاصيل القبض على المجرم: "بعد انتشار المقطع على مواقع التواصل المباحث في نفس اليوم وصلت للشاب ده ومسكوه واعترف، وعن طريق ناس من المنطقة المباحث وصلتلي وكلموا بابا وجولنا عند البيت عشان يكملوا التحقيقات".

وأكملت: "دخلوني في طابور عرض للتعرف على المتحرش ومواجهته، دخلي في طابور العرض مرتين كان حاطط وشه في الأرض واتعرفت عليه".

"بعد كده عرفت من الإعلام إنه قال إنه مريض نفسي، وأكيد دي محاولات منه للهروب من جريمته، وأتمنى إنه ينال عقوبة رادعة تخلي أي حد يفكر ألف مرة قبل ما يعمل حاجة زي كده".

كانت وزارة الداخلية أصدرت بيانًا يؤكد القبض على الشاب مرتكب الواقعة جاء فيه: "فى إطار جهود أجهزة الوزارة لكشف ملابسات ما تم تداوله على إحدى الصفحات على موقع التواصل الاجتماعى فيسبوك بشأن مقطع فيديو يتضمن ظهور شخص يتحرش بفتاة أثناء سيرها بالطريق العام، بالفحص تبين عدم وجود بلاغات بالواقعة وتم تحديد الشخص المتهم دون الفتاة، عامل بأحد المحال، مقيم بدائرة قسم شرطة دمنهور بالبحيرة، وبمواجهته اعترف بارتكاب الواقعة دون علمه بالفتاة أثناء سيرها بالشارع في شهر فبراير الماضى، وتم اتخاذ الإجراءات القانونية".