• الأم المثالية في الشرقية: "ربيت 3 ولاد بـ 2 جنيه معاش وريال أجرتي من شغل الغيطان"

    03:10 م الإثنين 18 مارس 2019
    الأم المثالية في الشرقية: "ربيت 3 ولاد بـ 2 جنيه معاش وريال أجرتي من شغل الغيطان"

    الأم المثالية في الشرقية

    الشرقية – فاطمة الديب:

    "جوزي مات في حرب 67، كنت صغيرة لسه وحامل في محيي اللي ما شافش أبوه ولا أبوه شافه.. رفضت كل العرسان اللي اتقدمولي وقولت أربي عيالي".. بهذه الكلمات بدأت الحاجة سنية درويش عامر، من قرية "الملكين البحرية" التابعة لمركز الحسينية، بمحافظة الشرقية، حديثها لـ"مصراوي" بعد حصولها على لقب الأم المثالية على مستوى المحافظة.

    وروت الحاجة سنية، تفاصيل كفاحها مع أبنائها وشغلها في الأراضي من أجل تربية أطفالها بالحلال، قائلةً: "كنت بصرف معاش 2 جنيه بعد ما جوزي ما مات في حرب 67، وما لحقناش نقعد مع بعض كتير.. الله يرحمه ساب لي 3 عيال صغيرين (فريال ومنى ومحيي)، والأخير كان لسه جنين في بطني ما شافش أبوه".

    وتابعت: "بعد الوفاة كنت أروح أجيب المعاش من مديرية الأمن كل شهر، وعلشان أعرف أربي العيال خرجت أشتغل في الأراضي بيومية 20 قرش (ريال)، وقولت أربيهم من تعب إيدي وما أمدش إيدي لحد ولا أجبلهم راجل تاني يضربهم ويزعلهم".

    "أبويا الله يرحمه كان مبسوط وربنا كرمه ووقف جنبي كتير في تربية ولادي، لكن الحمد لله ربنا عوض صبري خير وتعبت ونولت"، قالتها الأم المثالية بالشرقية، منوهةً بنجاحها في حصد ثمرة تعبها في تربية أبنائها: "علمتهم التلاتة أحسن تعليم، فريال الكبيرة مديرة مدرسة، ومنى موظفة بالإدارة التعليمية، ومحيي حاصل على بكالوريوس تجارة"، قبل أن توضح أن نجلها هو من قدمَّ لها بالمسابقة، وأن أمنيتها الأخيرة تتلخص في أن يمنَّ الله عليه بالشفاء: "ابن محيي بيتعالج.. نفسي ربنا يشفيه ويرزقني زيارة بيته الحرام".

    إعلان

    إعلان

    إعلان