مواطنون بالبحيرة بعد رفع أسعار التموين: "يلغوه أحسن "

البحيرة – أحمد نصرة:

أبدى عدد كبير من مواطني محافظة البحيرة استيائهم الشديد من قرار وزارة التموين برفع سعر الزيت من 10 إلى 12 جنيهأ و السكر من 7 إلى 8 جنيهات اعتبارا من أول فبراير.

قال محمود حسين – عامل: " الحكومة خلاص مابقاش عندها أي إحساس بالغلبان، أنا رأيي يلغوه أحسن وخلاص بدل ما إسمنا بناخد تموين عالفاضي ".

وأضاف سيد عبد العزيز – معلم " فين مجلس الشعب من إلي بيحصل فينا، ولا بدل ما هما بيشتروا عربيات بالملايين والدنيا مرتاحة معاهم هيفكروا في الشعب المطحون ليه".

وقالت نسمة محمد – طالبة:" بعد الزيادة دي السكر بالسعر الحر هيعدي 18 جنيه وأسوأ نوع زيت هيعدي 20 جنيه، الحكومة بدل ما تسعى لأنها تهدي الأسعار، بتشعللها أكتر".

وأوضح زكي رضوان:" بدل الحكومة ما تزود التموين و الدعم للمواطن علشان تساعده في الغلاء إلي احنا عايشينه بتعمل العكس وتزوده علينا، كده نصيب التموين للفرد مبقاش غير كيس سكر و زجاجة زيت المفروض يقضوه طول الشهر، طيب مش هيحتاج رز أو مكرونة أو شاي أو أي حاجة تانية".