إعلان

متقرطسنيش ماخلاص.. أنا فاض بيّا وملّيت

محمد حنفي نصر

متقرطسنيش ماخلاص.. أنا فاض بيّا وملّيت

محمد حنفي نصر
09:00 م الثلاثاء 17 ديسمبر 2019

جميع الآراء المنشورة تعبر فقط عن رأى كاتبها، وليست بالضرورة تعبر عن رأى الموقع

حضرتك متقرطس.. أيوه انت متقرطس.. ومتبصليش بغباوة كده وتعمل لي فيها متفاجئ. أيوه متقرطس.. أو كما جاء بالقاموس المحيط قرطاااس. وقبل ما تنفعل وتهيج أوردتك الدموية يجب أن تعلم أن هذه لغة عربية فصحي. فاللفظ قرطس يعني فعل القرطسة. أما متقرطس فمفعول به. أي جُعل منه قرطاساً. ومن عجائب المعاني التي وردت في المعجم الوسيط أن ضمن معاني القرطاس هو الجارية البيضاء الفرعة. وأيضاً الحمار الأبيض شديد البياض. وأنا متأكد أن حضرتك لن تقبل أن تكون الجارية البيضا الفرعة الملبن. صح؟ تبقي حضرتك إإييييه؟ أيوه بالظبط كده. حمار شديد البياض.. يعني مش بس حمار. لكن كمان حمار على الأبيض.. خام يعني.. أصنص الحمير ولمؤاخذة. ومعلش متزعلش مني. مش انت لوحدك.

وهو ده العصر اللي احنا عايشينه. عصر القرطسة. ومن ملامح عصر القرطسة أن يبقي فيه وكالة عالمية بتطلع موسوعة للأرقام القياسية في أي حاجة. أطول واحد. أقصر واحد. صاحب أطول فترة من غير حموم.. الحائز على أكبر كمية قمل في شعره... إلخ. وده عادي وحقيقي ولو حضرتك راجعت الموسوعة ح تلاقي بلاوي. وعشان اعلان اتحط في مول تجاري لمطرب عاتفي بدأ مشواره الغنائي بالهروب من الجيش وناس كتبت على الاعلان تعليقات. قوم بقي ايه. واحد يودي الإعلان ده للوكالة إياها عشان تقول ان الإعلان ده عليه أعلى رقم تعليقات في مول.

وهنا تنشط غدة القرطسة عند مطربنا العظيم فيعلن لجمهوره ومحبيه انه حصل على شهادة أكثر المبدعين الشبان إلهاماً وتأثيراً في العالم فيتسابق زملاؤه ومحبوه المتقرطسين ومعاهم كتيبة مذيعين وبرامج للتهاني ونشر الخبر.. طب نكفي بقي ع القرطاس ماجور؟ لا. ده كمان يطلع بنفسه في مداخلات ويقول إن اللي حصل ده مكانش سهل. ده كان حصاد سهر وشقا وتعب ومجهود. وان اختياره كأهم فنان ملهم ومؤثر في الجمهور لم يكن من فراغ وان مفيش مستحيل. آه والمصحف قال كده

ولم يكتف العاتفي بما سبق بل استطاع ان يستغل الفرصة على الهواء ويضيف لنا قرطاس آخر بأن فيلمه الأخير حقق أعلى إيرادات في تاريخ السينما المصرية رغم أنه محققش ربع إيرادات الأفلام الأخيرة. والمذيعة اللوذعية تهز القرطاس علي راسها وتأكد على كلامه ليتحول القرطاس في تلك اللحظة الفارقة في تاريخ الاعلام العربي إلى طرطور بترتر تتباهى به وسط المتقرطسين.

ورغم الصمت السائد في نقابة الموسيقيين ونقابة المهن التمثيلية إلا أن الأمر قد أثار حفيظة الوكالة العالمية للأرقام القياسية. وأبى أصحابها بشموخ أن يتقرطسوا. فسارعت بالإعلان رسمياً وهي تحلف على الختمة الشريفة إن المطرب الملهم كداب في أصل وشه وكان ناقص رئيسها يكشف راسه ويحسبن ويكنس عليه السيدة نفيسة.

أما إعمالاً لنظرية قرطاس يفوت ولا حد يموت. فإنه حتى هذه اللحظة لم يخرج علينا المطرب الملهم ليعتذر عن محاولته قرطسة الرأي العام. والأدهى يا مبارك حالة الصمت النقابي على نهج الدكتور شديد.. وماله ياخويا.. الواد ابننا.. ده قرطاس جميل خالص..

وصحيح.. على رأيك.. يعني هي جت ع القرطاس ده.. مانت طول النهار بتتقرطس وساكت.. تدخل قهوة مودرن يجيب لك كوباية نسكافيه ما تسواش جنيه وربع وتكع فيها ٢٠ جنيه غير الخدمة والضريبة ويقولك أصله نسكافيه يتيم وبندلعه وبنقوله يا موكّا. تشتري ورك الفرخة الهربانة من الإصلاحية ابو عشرة جنيه ب ٥٠ جنيه ويقرطسك ويقولك اختشي قطع لسانك ده اسمه زنجر كرسبي. وعد بقي يا مولانا.. السباك علي المنادي علي النقاش علي الدكتور علي المذيع علي الفكهاني.. وشوف كام واحد كل يوم بيقرطسك. ف مجاتش يعني على مطربنا الملهم نفرحه بقرطاسنا زي ما فرحنا وبيفرحنا كل يوم بأعماله العظيمة التي سيتوقف أمامها التاريخ وهو يكتب في صفحاته بمداد من نور.. عن عصر المتقرطسين.

إعلان