قال الدكتور محمد معيط، رئيس المجموعة العربية في صندوق النقد الدولي ووزير المالية السابق، إن تقييم وضع الاقتصاد المصري يجب أن يستند إلى الأرقام والمؤشرات، مشيرًا إلى أن مشكلة الدين لا تتعلق بحجم الدين فقط، وإنما بتكلفة خدمته وتأثير أسعار الفائدة والتضخم على موارد الدولة.
جاء ذلك خلال لقائه مع الإعلامي والكاتب الصحفي مجدي الجلاد، رئيس تحرير مؤسسة "أونا" للصحافة والإعلام، التي تضم مواقع: ("مصراوي" و"يلا كورة" و"الكونسلتو" و"شيفت")، في بودكاست "أسئلة حرجة" المذاع على "مصراوي".
محمد معيط: "هات لي الأرقام وتعال نتكلم عليها"
طرح "الجلاد" في بداية الحديث بشأن حقيقة الأزمة الاقتصادية التي تمر بها مصر، في ظل حديث الحكومة عن تأثر الاقتصاد بعوامل خارجية، مقابل آراء خبراء يرون أن هناك مشكلات هيكلية داخلية ممتدة منذ عقود.
وقال إن عددًا من الخبراء يتحدثون عن اعتماد الاقتصاد المصري على الجوانب والمصادر الريعية، وعدم كفاية الإنتاج، إلى جانب مشكلات في التخطيط والسياسات الاقتصادية وتراكم الديون، متسائلًا: "هل حضرتك شايف إن إحنا في أزمة ولا إحنا داخلين على أزمة أكبر؟".
ورد محمد معيط: "بص، أنا عاوز أقول لك على حاجة، أنت علشان تقدر تحلل الأمور بموضوعية هات لي الأرقام وتعال نتكلم عليها".
وأوضح أن مقارنة مؤشرات الدين بالناتج المحلي الإجمالي تعطي صورة مختلفة عن حجم المشكلة، قائلًا: "بمعنى: لو أنت جيت وبصيت سنة 1980 / 1981 / 1982، الدين للناتج المحلي الإجمالي بتاعك كان كام؟ 158%، تمام؟ طب والدين للناتج المحلي الإجمالي بتاعك النهاردة كام؟ بنتكلم في 80%، والموازنة الحالية بتتكلم إنه هينزل 78%".
"المشكلة دايمًا خدمة الدين مش الدين"
أشار الدكتور محمد معيط، إلى أن التركيز يجب أن يكون على تكلفة خدمة الدين، وليس حجم الدين فقط، قائلًا: "الدين كمؤشر أنت حضرتك أشرت إليه، أنا واحد من الناس بقول المشكلة دايمًا خدمة الدين مش الدين بدليل إنه في دول كتيرة جدًا الدين عندها 230% و240% ما كانتش قلقانة منه، دلوقتي قلقان على فكرة، ليه؟ لأنه في تضخم".
وأوضح أن ارتفاع معدلات التضخم يؤدي إلى زيادة أسعار الفائدة، وهو ما ينعكس بدوره على تكلفة خدمة الدين، قائلًا: "التضخم بيدفع بأسعار الفائدة للارتفاع، أسعار الفائدة أما بترتفع بتاخد موارد الدولة".
وتابع: "لأنه في فرق بين إنك أنت مثلًا على سبيل المثال في مصر لما كان التضخم عندك 5% أو 6% أو 7%، فكانت أسعار الفائدة عند 9% أو 10%، غير لما أسعار التضخم راحت لحاجة و30% أو قرب الـ40%، فأسعار الفائدة اتحركت لقرب الـ30% وتعدته".
وأضاف: "فبقت تكلفة خدمة الدين واكلة موارد الدولة، ساعتها بتأثر على مستوى معيشة المواطنين، ليه؟ لأنك أنت جزء كبير بيروح لكده".
معيط يشرح مصادر التضخم: "ممكن يكون من الطاقة أو العرض والطلب"
تطرق وزير المالية السابق إلى أسباب التضخم، موضحًا أنه قد يرتبط بطبيعة هيكل الاقتصاد، لكنه شدد على ضرورة تحليل الأسباب بشكل أكثر موضوعية، وقال: "فأنت ممكن تقول لي: طب ما هو التضخم نفسه هو أثر من آثار الهيكل بتاع الاقتصاد، أقول لك ممكن، بس تعال نحلله بطريقة أكثر موضوعية".
وأضاف أن هناك تضخمًا ناتجًا عن ارتفاع أسعار الطاقة المستوردة، قائلًا: "في تضخم جاي لك من أسعار الطاقة اللي أنت بتستوردها".
وأشار إلى وجود عوامل أخرى، موضحًا: "في تضخم جاي لك من عدم توازن بين العرض والطلب، إن عدد السكان بيزيد فأنت عاوز طلب، أنت مش قادر تواجهه بالعرض الكافي اللي يحدث هذا، ممكن تضخم ناتج عن حجم السيولة المتاحة".
مجدي الجلاد: "دي أخطاء سياسات استمرت عقود طويلة"
عقب الإعلامي مجدي الجلاد على حديث "معيط" مؤكدًا أن جانبًا من الأزمة يرتبط بأخطاء سياسات اقتصادية ممتدة، قائلًا: "دي أخطاء سياسات يا دكتور استمرت عقود طويلة".
وأضاف: "دول كتيرة جدًا كانت أوضاعها الاقتصادية أصعب مننا وقابلت ظروف خارجية وداخلية، بس قدرت تعمل سياسات اقتصادية إنها تعدي من عنق الزجاجة، إحنا لسه إحنا لسه مزنوقين زنقة وحشة قوي".
ورد "معيط" على "الجلاد" قائلًا: "بص، أنا عاوز أقول لك على حاجة، معاك حق، لكن خليني أقول لك في فرق بين إنك أنت عندك تحديات وعندك برامج بتقدر إنك تتعامل مع التحديات وما عندكش".
وأوضح أن بعض الأزمات الحالية ارتبطت بتطورات خارجية مباشرة، قائلًا: "يعني ما قلته عليه إن هو التحدي الخارجي اللي جاي لك، الأزمة اللي أنت عايشها من فبراير دي كلها كانت معظمها جاي لك منين؟ من حرب على باب بيتك، واخد بالك؟".
وأضاف: "الحرب دي أدت إلى إيه؟ إنك أنت بتستورد طاقة، الطاقة دي كنت بتستوردها بسعر معين، السعر ده على الأقل زاد 70% أو 80% عن ما كانت عليه إنك تدفع الثمن ده، بس الثمن ده ما كانش داخلي، الثمن ده جه من أزمة حرب على باب بيتك".
"الطيارة الروسية وقعت.. والسياحة بقت زيرو"
استشهد الدكتور محمد معيط معيط بما حدث في عام 2015، موضحًا أن الاقتصاد المصري تأثر في فترات سابقة بأحداث خارجية انعكست على مصادر العملة الصعبة، وقال: "أنا فاكر في 2015، في 2015 كان في سياحة فجأة الطيارة الروسية وقعت، لما الطيارة الروسية وقعت قفلت كل فنادقك بقت زيرو سياحة، ده راح ضارب لك العملة الصعبة اللي كانت جاية".
وأضاف: "فدايمًا اللي أنا بحاول أقوله لك إنه مش باستمرار تفصل وتقول دي هي فقط السياسات، أنا مش في معزل عن المنطقة اللي أنا عايش فيها ولا معزل عن تحديات داخلية وخارجية مع بعض بتؤثر في الوضع الخاص بيا".
وأشار وزير المالية السابق إلى أن طبيعة هيكل الاقتصاد المصري تجعله يتأثر بتعطل بعض مصادر العملة الأجنبية، موضحًا: "خاصة ارجع للهيكل الاقتصادي بتاعي، والهيكل الاقتصادي مبني عندي سياحة، عندي صادرات، تحويلات مصريين في الخارج، تصدير، عندي أي حاجات لما واحد فيهم بيتعطل بيبقى آثاره سلبية عليك".
وتابع: "فإذا جه مثلًا قطاع سياحة اتعطل عندك ما هو ده عملة صعبة أثرت عليك، لما جت قناة السويس عندك تأثرت ما هو ده أثر عليك".
"في النهاية أنا كمواطن عاوز أعرف حطيت في جيبي كام"
أكد "معيط" أنه لا ينفي وجود تحديات داخلية أو إمكانية وجود اختلاف في تقييم السياسات والأولويات، قائلًا: "أنا ما بقولش إن إحنا يعني بنهمل الجانب الداخلي، وما بقولش إن إحنا سياساتنا... لأن إحنا في الآخر بشر وفي الآخر اجتهاد وما إلى ذلك وفي الآخر أولويات، أنت بتشوف الأولويات بطريقة وأنا بشوف الأولويات بطريقة".
وأوضح أن الحكم النهائي على السياسات الاقتصادية يرتبط بتأثيرها على مستوى معيشة المواطن وقدرته الشرائية، قائلًا: "طبعًا في النهاية تقول ليه، بس في الآخر تأثيره على مستوى معيشة المواطن أنا هو ده ممكن الحكم".
وأضاف: "زي واحد كان يقول لي: بص قول اللي أنت عاوزه واتكلم زي ما أنت عاوز، في الآخر أنا ببص أنت حطيت في جيبي كام واللي حطيته في جيبي ده بيجيب لي قد إيه من السلع والخدمات اللي في المجتمع، طول ما أنا بشوفها بتقل أنا بحكم عليك".
معيط: "المواطن معاه حق يطالب بتحسن مستوى معيشته"
أشار معيط إلى أن فهم تداعيات الأزمات الخارجية لا يعني تجاهل أثرها على المواطن، موضحًا: "ده وجهة نظر وتحترم وكل حاجة، بس أنا بحاول بقى أشرح وأدافع عن وجهة النظر إنه: طب بس أنا متأثر بأنه الغاز نتيجة للأزمة دي ارتفع سعره كذا، فأثر عليا سلبًا في العملة الصعبة، وأثر عليا في تكلفة المنتج اللي أنا بطلعه، الكهرباء أو خلافه يعني".
وأكد أهمية الحوار لفهم أسباب الأزمات وتأثيراتها، قائلًا: "محتاجة حالة حوار عشان نفهم هو ده ليه وده ليه".
واختتم الدكتور محمد معيط حديثه بالتأكيد على حق المواطن في المطالبة بتحسين مستوى معيشته، قائلًا: "بس في النهاية أنت بتقول لي: والله ده عليك إنك تديرها علشان في الآخر أنا عاوز إن أنا قدرتي الشرائية ما تدهورش بالوضع ده، أو أنا عاوز إن مستوى معيشتي يتحسن، معاك حق، أنت كمواطن معاك حق وكامل الحق إنك أنت تطالب بده، أنا كمسؤول برضه محتاج إن أنا أشرح لك الوضع اللي أنا فيه وإيه التحدي اللي أنا بقابله".
اقرأ أيضًا:
أموال المعاشات راحت فين؟.. معيط يجيب عن الأسئلة الصعبة مع مجدي الجلاد
محمد معيط يكشف مفاجأة: اشتغلت في محل عصير قصب لتحسين دخلي (فيديو)
