"دمرني تدميرًا".. عماد أديب يكشف كواليس أصعب حوار في مسيرته - فيديو

كشف الإعلامي والكاتب الصحفي عماد الدين أديب، أصعب حوار أجراه خلال مسيرته المهنية الممتدة لنحو نصف قرن، مشيرًا إلى أن الحوار كان مع ملك الأردن الراحل الحسين بن طلال، واصفًا إياه بأنه كان "ثعلبًا" بالمفهوم الإيجابي السياسي.

جاء ذلك خلال لقاء عماد الدين أديب مع الإعلامية لميس الحديدي في بودكاست "موعد مع لميس" المذاع على "مصراوي"، إذ سألته عن أصعب حوار أجراه طوال مسيرته التي بدأت بلقاءات مع الرئيس الراحل أنور السادات وهو طالب، وصولًا إلى لقاءاته مع عدد كبير من الشخصيات السياسية.

عماد الدين أديب: خرجت من الحوار وقميصي "بيخر مية"

سألت لميس الحديدي: "إيه أصعب حوار عملته؟ نصف قرن من الحوارات ابتدأتها بالسادات وإنت طالب، يعني آخر مرة جلست مع عون ولكن ربما ليس حوار ولكن كنت في لقاء مع الرئيس اللبناني.. في كل هذه الحوارات مئات الحوارات إيه أصعب حوار عملته؟".

ورد عماد الدين أديب: "جلالة الملك حسين رحمه الله".

وعندما سألته لميس الحديدي عن السبب، أجاب: "ثعلب" بالمفهوم الإيجابي السياسي.. سيدتي أنا كنت في فبراير في قصره في على تلة في عمان، عز البرد عمان بتبقى برد، خرجت من المقابلة قميصي بيخر مية".

وقاطعته لميس الحديدي: "من كتر التوتر والقلق؟"، ليرد أديب: "لا لا لا لا، أنا قبليها بيوم كان عازمني على الغداء أنا وهو بس، فقلت له السؤال اللي بسأله لأي حد، هل في سؤال خاص تحب مأسألهولكش؟ ممكن يكون سؤال شخصي عن زوجته عن ولاده حق أي ضيف أنا بشوف إنه لو في شيء ممكن يكون بيضايقه أو يحرجه إلا إذا كان سؤال موضوعي، يعني واحد سارق سرقة مثلاً ومتهم بجريمة فلازم أسأله عن الموضوع، لكن لما يكون إنسان يعني عادي طبيعي أسأله بتاع، فقال لي لا لا لا لا".

وأضاف عماد الدين أديب: "قال لي أنا طلبت منك أسئلة؟ قلت له وأنا مابديش أسئلة للمذيع، قال لي أنا ما بطلبش أسئلة، إنت تسأل قالهالي بالإنجليزي You ask the way you like and I will answer you the way I like).. يعني إنت تسأل زي ما إنت عايز وأنا هجاوب زي ما أنا عايز".

"كان واثقًا من قدراته على المناورة والإقناع"

أوضح أديب أن شخصية الملك الراحل الحسين بن طلال كانت تتمتع بقدرة كبيرة على المناورة والإقناع، مستشهدًا بطريقة الملاكم الراحل محمد علي كلاي، قائلًا: "عارفة محمد علي كلاي لما كان بيلعب الملاكمة منزل إيديه الاتنين، دائمًا الملاكمة لازم تبقي حاطة إيديكي، لا لا لا لا ده (Very easy) وريني وريني هات اللي عندك وريني هتقدر تعمل إيه، لإنه واثق من قدراته على المناورة وعلى الإجابة وعلى الإقناع وعلى الكاريزما".

وأضاف: "رجل عنده قدرة بارعة في الكاريزما وفي الإقناع وفي الرد وفي تطويع منطقه لدرجة إنك في لحظة تلاقي نفسك ابتدأتي تقتنعي بيه فتنبهي نفسك تقولي لا لا لا لا إوعى تصدقه لا ارجع تاني ده هو بيلف عليك".

وتابع: "يعني طول ما إنتِ قاعدة معاه خايفة إنه هو يسيطر على على دماغك".

الملك الحسين حاول تشتيت تركيزه قبل السؤال

كشف الإعلامي عماد الدين أديب عن موقف طريف خلال الحوار، موضحًا أن الملك الحسين أدرك السؤال الذي كان يستعد لطرحه، وحاول تشتيت تركيزه، قائلًا: "وفعلاً كان كده، جيت بقى في وسط المقابلة وأنا داخل على سؤال، إنتِ عارفة في سؤال اسمه Building آه، يعني مش هو السؤال ده هو سؤال اللي بعده هو السؤال بس إنتِ بتجري رجل الضيف علشان تبتدي تبني عليهم".

وأضاف: "لسه هسأله السؤال ده وداخل فيه، هو فهم أنا رايح لفين، راح عامل إيه؟ هو كان بيدخن كان مشهور إنه يدخن في أي مكان، فكان قاعد على كرسي كده وأنا قاعد على كرسي زي ما إحنا قاعدين مع بعض، راح قايم من مكانه مطلع علبة السجاير وقال إنت بتدخن خد سيجارة يا راجل، قتلني، عارفة ربكني، دبح التركيز".

"المشاهد بقى بيتفرج على ملك بيدي سيجارة لصحفي"

أوضح "أديب" أن الموقف نقل تركيزه بعيدًا عن السؤال الذي كان يستعد لطرحه، قائلًا: "فأصبح دلوقتي المشاهد بيتفرج على إيه؟ بيتفرج على ملك بيدي سيجارة لصحفي، لكن مش مركز مع فكرة الملكية الدستورية اللي أنا عايز أوصل لها، إنه كيف يمكن أن يصبح الملك ملك دستوري وما يكونش بالشكل الوراثي المعتاد يعني، فهم أنا الجريمة اللي عايز أعملها، كويس؟ فخدت السيجارة ورحت حاطتها على جنب".

وتابع: "راح رجع بعد ما قعد تاني لسه هبتدي أكمل السؤال تاني راح قايم مرة تانية وجايب الولاعة وقال لي هات السيجارة أولعالك".

وعلقت لميس الحديدي: "فوضعك في حرج"، ورد أديب: "ما أنا مش عارف أعمل إيه بقى، أنا كمذيع ماقدرش أدخن وبعدين وقتها وقتها -أنا دلوقتي امتنعت عن التدخين- وقتها مكنتش بدخن سجاير، أنا عمري ما دخنت سجارة أنا بدخن سيجار، فمش معقول أقول لملك الأردن لا أنا مابدخنش سجاير أنا بدخن سيجار يعني هتبقى نوع من التعالي الفظيع وماقدرش أقول له إن أنا ماقدرش أدخن لأنه ما ينفعش وأنا بدير حوار أكون مدخن".

واختتم الكاتب الصحفي عماد الدين أديب حديثه عن اللقاء قائلًا: "فهو لعب معايا اللعبة للأخر، وإحنا بقى بعد ما خلصنا الـ"إنترفيو" مسكني كده من إيدي قال لي "هل استمعت؟".. ما هو عارف هو عمل فيّ إيه دمرني تدميرًا يعني حطمني تحطيمًا".
اقرأ أيضًا:
"قولت له أنت قاتل".. عماد أديب يكشف لأول مرة لماذا حاور نتنياهو ؟ - فيديو

بين السياسة والصحافة والفن.. عماد أديب في موعد مع لميس الحديدي – فيديو

بالفيديو.. لميس الحديدي: أنا صحفية.. وفترة CBC أعظم أيام حياتي المهنية