مذيعة تسأل مجدي الجلاد عندك كام مليون في البنك؟.. والأخير يرد - فيديو

كشف الكاتب الصحفي والإعلامي مجدي الجلاد، رئيس تحرير مؤسسة "أونا" للصحافة والإعلام التي تضم مواقع (مصراوي، يلا كورة، الكونستلو، شيفت)، تفاصيل مهمة من حياته الاجتماعية وخلفيته الشخصية، ردًا على تساؤلات خلال حوار تلفزيوني بشأن وضعه المعيشي وخلفيته الأسرية.

وقال "الجلاد" للمذيعة نبيلة البدوي: "هو إنتِ فاكراني ابن سراج منير الباشا في الأفلام ؟ لا، أنا من عيلة متوسطة"، لتعلق المذيعة نبيلة البدوي خلال برنامج "خارج النص" من جانبها قائلة: "يعني تاريخ حضرتك ده كله ما عرفتش تجيب فيلا لحد النهارده؟"

ورد الكاتب الصحفي مجدي الجلاد موضحًا: "لا، أنا سكنت في شقق في كل الأدوار وفي كل حتة، وعانيت وكل حاجة، ونمت على مرتبة على الأرض عادي خالص، واتكحردت وأنا صغير، وركبت أتوبيس نقل عام، وجبتها من الصفر.. وأنا من عيلة متوسطة؛ أبويا كان راجل تربية وتعليم الله يرحمه، وأمي ست بيت، عيلة أبويا كويسة وعيلة أمي كويسة."

وتابعت المذيعة: "إحنا بنتكلم عن دلوقتي.. دلوقتي يعني أنت مش معاك مثلاً كام مليون في البنك؟"، فرد الجلاد: "لا لا، أنتِ ما تعرفينيش.. إنتِ بتتكلمي في الحتة دي مع إنها نقطة خاصة جدًا على فكرة.. وبره في الغرب فيه حاجات بيختلفوا فيها عننا، وبحبهم في الحتة دي مع إن إحنا أحسن منهم.. بيقولك 3 حاجات إوعي تسألي البني آدم فيهم: دخله أو فلوسه، مراته أو حبيبته لأن بره بيقولك حبيبته، أو دينه؛ دي حريات شخصية.. وأنا أقسم بالله عمري ما كان معايا ملايين في البنك خالص."

وسألته المذيعة: "عمرك؟" فأجاب: "خالص.. أنا بحلف لك.. هو إنتِ هتحاسبيني؟" مردفًا بقوله" علفكره أنا طول عمري بتفحص من الأجهزة الأمنية والرقابية والضرائب وكل حاجة، فده معروف"، وعلّقت المذيعة: "الصحفيين الكبار كلهم طلعوا مش زي ما إحنا فاكرين."

واختتم الإعلامي مجدي الجلاد حديثه قائلًا: "ما هو في اختيارات.. وده اللي أنا قعدت ولادي عليه.. أنا بقا مستور الحمد لله، وعايش حياة كويسة ونعمة كبيرة من ربنا، الحمد لله أحسن من 99% من البشر ماديًا، لكن مش ثري.. وقلت لولادي زمان أيام خناقات الوطن سنة 2014 - 2015: عايزين أبوكم يبقى غني ويبيع مبادئه وضميره؟ ولا عايزينه محترم وهنعاني مع بعض؟ قالوا لي خليك محترم.. وأنا بركب عربية بالتقسيط، لكن أنا أحسن من ناس كتير".

اقرأ أيضًا:

"النتائج هي المعيار الوحيد".. مجدي الجلاد يعلق على التعديل الوزاري الجديد

مجدي الجلاد: تراجع الوعي بالقضية الفلسطينية أخطر من العدوان نفسه - (فيديو)