ياسمين عز تعلق على فيديو الشيخ مبروك عطية: "أنا دلوقتي أستاذة بط بالرتقال"

كتب- إسلام لطفي:

علقت الإعلامية ياسمين عز، على الفيديو المسرب لها عبر موقع التواصل الاجتماعي "فيسبوك"، مع الداعية الشيخ مبروك عطية.

وقالت "عز" في تعليقها عبر برنامج "كلام الناس" عبر فضائية "MBC مصر" اليوم السبت: "اتعلمت إزاي أقور المحشي بنفسي وبقيت أستاذة في صينية البط بالبرتقال".

وأضافت: "لما باخد إجازة مينفعش تعدي بسلام، الأسبوع اللي فات لما خدت إجازة، قالك إلحق الفيديو أو الحلقة المسربة لياسمين مع الشيخ مبروك عطية، والفيديو المسرب اللي جابوه لما كنت مستضيفة الشيخ مبروك عطية من 8 شهور، كنا بنتكلم عن الرجل والمرأة، الشيخ كان بيتكلم عن الأكل وأنا كنت بكلمه عن المحشي، وكنت بقوم بدور الطرف الغائب في الحوار".

وأكملت: "قلت للشيخ أنا دلوقتي مبعرفش أطبخ محشي، وجوزي مقتدر، إيه المشكلة إنه يجيب طباخة؟! واسترسلنا في الحديث، وهنا أنا كنت بتكلم بالنيابة عن الطرف الغائب في اللقاء". مضيفة: "ورغم هذا، أنا من سنة ماكنتش بعرف أعمل محشي، الإنسان لازم يتعلم من أخطائه ولا زم يتطور، أنا بتعلم وبتطور، وبقيت أعرف أعمل المحشي، إضافة إني أستاذة ورئيسة قسم في عمايل البط بالبرتقال".