• "مول ووسائل إطفاء مقفولة".. 15 تصريحًا جديدًا لكامل الوزير

    05:05 ص الأحد 24 مارس 2019

    القاهرة- مصراوي:

    حذر المهندس كامل الوزير، وزير النقل، من التقصير في العمل، قائلاً: "الفاسد هنقطعله إيده".

    وأضاف الوزير في لقاء لبرنامج الحكاية عبر فضائية "إم بي سي مصر"، مساء السبت، أنه يعمل جاهدا من أجل الارتقاء بالخدمات التي تقدم للمواطنين، لافتًا إلى أن وزارة النقل خدمية تحتك بالمواطنين بشكل يومي وبكل نواحي الحياة.

    ويستعرض مصراوي، أبرز تصريحات "الوزير" خلال لقاءه مع برنامج "الحكاية"..

    - وزارة النقل تقيلة وخدمية تحتك بالمواطنين يوميًا وعلى مدار الساعة وفي كل نواحي الحياة.

    - بعمل جولات كتير لكي أرى التوجيهات والتعليمات اللي بقولها بتتنفذ ولا لاء، وعلى فكرة مش في السكة الحديد بس لكن عندنا الطرق والكبارى والنقل البحري والبري.

    - ممكن أعطي تعليمات لشخص وهو مش قادر ينفذها لأكثر من سبب، السبب الأول عدم الاستيعاب مني ويصبح العيب عندي، أو السبب الآخر يكون الشخص بحاجة لتوضيح أكثر لهذه التعليمات، أو عدم توافر لديه إمكانيات تنفيذ تلك التوجيهات، علشان كده لازم أطلع وأشوف على الأرض.

    - أنا كنت اتكلمت أكتر من مرة في موضوع الأنفاق المغلقة، وتأكدت اليوم من سير العمل بشكل كامل وفتح الأنفاق ووضع كاميرات مراقبة وتركيب إضاءة بها إضافة لتشغيل سيارات الجولف التي كانت متوقفة عن العمل بمحطة مصر.

    - لقيت النظافة بدأت تظهر في المحطة، والجمهور بدأوا يذهبوا لقطع التذاكر بالشباك الخاص بالتذاكر بدل ما كان يستنى يروح القطار ويقطع التذكرة، طيب الكمسري لو مجالكش، يبقى أنت مدفعتش تذكرة وهتأثر بالسلب على القطاع.

    - لقيت في الجولة مول محطة مصر معمول من سنتين شيك جدًا ولكنه لا يعمل، لكن النهاردة وجهت تعليمات بتشغيله وعمل إعلانات عنه إعادة تشغليه.

    - زرت مكان الحادث ووجدت أن مخلفات الحادث وآثارها تم تنظيفها بالكامل، وكلفت بتشغيل وسائل الإطفاء الموجودة بالمحطة.

    - حادث قطار محطة مصر إدنا درس في مسألة وسائل الإطفاء، ومينفعش يبقى فيه وسائل إطفاء موجودة بس مقفولة ونسأل عن المفتاح يقولوا مش لاقيينه، ده سلوك مش مضبوط".

    - معنديش مانع أفهم الناس مرة واثنين وثلاثة، اللي عاوز يشتغل معانا أهلا وسهلا، بس اللي هيمد إيده هنقطعهاله، اللي عايز يشتغل معايا على راسي من فوق.. ولكن اللي مش عايز يشتغل يسيبني اشتغل ويبعد عني.. والفاسد هنقطعله إيده ومش هنسيبه".

    - عندنا شركة تتبع السكة الحديد قوية جدا أنا فوجئت بها، ومكنوش بيشتغلوا يومي السبت والجمعة، لكن اتفقت معاهم أنهم يشتغلوا يوم السبت محدش يكلمني في الفلوس اشتغل وانتج وشوف بعد كده هديلك إيه.

    - كانت الجولة الثانية منطقة بشتيل ووجدت من 30 إلى 32 فدان تابعين للسكة الحديد، فكلفت باستغلالها ونعمل تخطيط شامل ومحطة فيها لكل قطارات الصعيد مع الورشة وجراج متعدد الطوابق، ونعظم الاستفادة منها ونخف شوية عن محطة رمسيس.

    - أول مرة أزور محطة الجيزة، وإن شاء الله مش آخر مرة، أنا قلت لزملائي هتلاقوني من أسبوع إلى 10 أيام أشوف التعليمات اتنفذت ولا لاء واتابع.

    - زمايلي العمال وعدوني أنهم هينفذوا التعليمات وكان أهمها انتظام حركة القطارات اللي موجودة.

    - مش هنزود سعر التذكرة دلوقتي إلا لما نعمل اللي علينا ونجيب قطاراتنا الجديدة ونعظم مواردنا، وقبل أي حاجة وهنطلع ونقولكم إيه رأيكم في اللي حصل.

    - بقول للمواطنين أصبروا شوية، هنبذل مجهود وهنشتغل علشان نرضي ربنا ونرضيكم.

    كان المهندس كامل الوزير، وزير النقل، تفقد أمس السبت، محطة مصر؛ لمتابعة تنفيذ التكليفات التي وجه بها خلال زيارته السابقة للمحطة.

    وأبدى الوزير -خلال الجولة-، استياؤه من عدم الاستغلال الأمثل للمحال المغلقة الموجودة بالمول التجاري للمحطة، خاصة مع انتهاء كل ما يتعلق بالتصاريح الخاصة بها وأصبحت جاهزة، مطالبا رئيس شركة "إم أو تي" للاستثمار والمشروعات -الذراع الاستثماري لهيئة السكك الحديدية- بموافته بتقرير عاجل عن أسباب عدم الاستغلال الأمثل لهذه المحال.

    كما تفقد الوزير، محطة الجيزة وهناك تابع انتظام العمل بمحطة الجيزة للسكك الحديدية، ووجه بزيادة عدد المقاعد المخصصة للركاب خلال عشرة أيام.

    إعلان

    إعلان

    إعلان