مشادة بين وزير الطيران وبرلماني: "متجيش متأخر وتقولي عيد كلامك"

وقعت مشادة كلامية بين وزير الطيران المدني، شريف فتحي، ورياض عبد الستار، عضو لجنة السياحة والطيران بمجلس النواب، خلال اجتماع، اليوم الإثنين.

ووجّه النائب حديثه للوزير قائلاً: "عايزين نعرف إيه اللي بيحصل للسياحة الروسية، إحنا مش مغيبين"، فردّ: "أنا قولت الكلام ده من بدري"، فانفعل النائب: "ما تقوله تاني، مينفعش تكرره، أنا عضو لجنة السياحة، عايز أعرف".

في المقابل انفعل وزير الطيران في وجّه "عبد الستار": "كنت جيت بدري، مش كل نائب يجي متأخر، أعيد ليه الكلام"، فعاود النائب الرد: "يعني أنت مينفعش تعيد الكلام"، فأجاب الوزير غاضبا: "آه ما ينفعش، متجيش بعد الموضوع ما يخلص وتقولي عيد كلامك"، فعقّب "عبد الستار" مرة أخرى بسخرية: "ليه هو الموضوع متعب"، فكان رد الوزير الأخير: "آه مُتعب".

وتدخلت سحر طلعت مصطفى، رئيسة لجنة السياحة والطيران، لإنهاء الموقف: "هناك ميعاد معلن للجنة، وكان يجب الالتزام بالحضور".