أرملة الشهيد عبدالرحمن عادل: "فخورة بزوجي وسعيده بتكريم الرئيس السيسي لي ولأبنائي"

كتب- محمد أبوالمجد:

قالت أرملة الشهيد "سلافة إمام": "إن زوجها فضل دخول كلية الشرطة عن كلية الهندسة في عام 2009، فهو كان محبًا لبلده ووطنه وكان يخدم في العريش لمدة 7 سنوات في قطاع الأمن المركزي منذ عام 2009 وحتى عام 2016"، مضيفة: "زوجي مر بأصعب أحداث كثيرة ووقت كان صعب أوي واستشهاد أصدقائه على يده وكان بيستنى الشهادة وبيتمناها، وكان شايل كفنه على ايده".

وأضافت "سلافة" في حوارها لبرنامج "مساء دي إم سي" على فضائية "دي إم سي" اليوم الأحد: "زوجي كان دايمًا بيقولي لو هستشهد هستشهد في العريش لأني نفسي أبقى زي زمايلي، وكنت حسيت شوية بالأمان عندما انتقل لقطاعات مختلفة، وكنت بقوله مستحيل ابقى قدها لو استشهدت، وكان بيقولي ربنا هيقدرك ربنا مش بيختارها لأي حد وزي ما بيختارها للشهيد ربنا هيديلك حاجة أعظم بكتير لأن هيبقى معاكي أطفال أيتام ملائكة وهتكوني البطلة من بعدي".

وتابعت: " سعيدة بتكريم الرئيس عبدالفتاح السيسي، لي ولأبنائي في احتفالية كلية الشرطة بعيدها الـ 70، ومصر كلها معايا، وفخورة بزوجي وكلنا فداء لمصر، والشهداء ضحوا بحياتهم عشان بلدنا توصل للاستقرار، ولو ولادي حبوا يدخلوا كلية الشرطة هوافق جدًا لأن العمر واحد وحب الوطن والبلد حاجة كبيرة مش أي حد يحسها الا اللي دخل فيها ولأن مصر تستاهل أن كلنا نضحى عشانها".

وقالت "ليان" ابنة الشهيد عبدالرحمن عادل، إنها حصلت على بطولة الجمهورية في لعبة الجمباز الفني..

وأضافت: "حسيت أن بابا فرحان أن أمي واخويا بيتكرموا من الرئيس السيسي وأنهم بيستلموا الدرع اللي بابا جايبه لينا في الأسرة، موضحة:"بابا واحشني جدًا وفاكرة أنه كان بيلعب معانا وبيعمل لنا الفطار ويهزر معانا وبيصحينا من النوم ".

وتابعت "كندة" ابنة الشهيد عبدالرحمن عادل: "فاكرة كل حاجة عن بابا كان بيفسحنا كل يوم ويسفرنا كل مكان، وكان دائمًا في إجازاته يودينا أماكن كتير حلوة"، مؤكدة: "لابسة هدوم عليها اسم بابا عشان أقول للناس أن بابا بطل ونتمنى نكون في الشرطة النسائية عشان ندافع عن بابا والوطن كله".

وأضاف "يونس" نجل الشهيد عبدالرحمن عادل: "بحب الكورة ونفسي أطلع زي بابا او محمد صلاح".