هو ده شعب مصر".. صاحب واقعة قطار الإسماعيلية وابنته يكشفان التفاصيل

كتب- محمد خميس:

قال محمد محمود فرغلي، المعروف بـ"سوبر بابا"، صاحب واقعة قطار الإسماعيلية، إنه من المنصورة ويعمل مدير مدرسة في منطقة بئر العبد بشمال سيناء، مضيفًا:"ببعت باقة ورد لكل شعب مصر، لكل اللي استغاثوا لربنا بإني أخرج من واقعة القطر على خير، وهو ده شعب مصر، وباشكر المسؤولين في محافظة الدقهلية، واللواء كامل الوزير وزير النقل، بعد ظهوره في إحدى القنوات وقال إني غلطت بس كنت عايز أنقذ بنتي".

وأضاف فرغلي، خلال حواره مع برنامج "مساء دي إم سي"، اليوم السبت: "موطننا الأصلي الدقهلية، وانتقلنا إلى العمل في بئر العبد، ومعتادون في كل إجازة نرجع البلد، والأولاد بعد انتهاء الامتحانات قالوا عايزين نروح في القطر، وأنا أول مرة أركب القطر مع ولادي، ركبنا من القنطرة غرب ونزلنا الإسماعيلية واستنينا القطر المتجه للقاهرة، ركبت القطر بأولادي الـ5 وزوجتي والشنط، ابني عمر 9 سنوات، أخدته مع شنطة ووزعنا نفسنا على الأبواب عشان الزحمة".

وأوضح صاحب واقعة قطار الإسماعيلية: "بلف عشان آخد خديجة بنتي، لقيت القطر اتحرك واحنا بننزل من القطر بشكل مفاجئ، واختل توازنها ووقعت بين العربتَين بشكل تدريجي، وأنا على الرصيف فوق.. ولو أنا صبرت كانت العريتين داسوا عليها، وربنا هداني ونطيت تحت عجلات القطر لإنقاذ بنتي دون تفكير، وربنا كرمنا والقطر بيتحرك.. وبعد تحرك القطر أصبحت موجودًا في الصورة اللي الناس شافتنا فيها".

وتابع فرغلي: "رحمة ربنا أن القطر ما أخدناش قدّامه، وكل واحد ليه عمر ولسه لينا نفس، وكنا في دنيا غير الدنيا، لأنه بالتفكير البشري كل حاجة انتهت، وكل ولادي واقفين بيبصوا علينا، وكل الركاب استغاثوا لربنا لحد ما خرجنا من الموقف ده"، معقبًا: "كل اللي كنت بافكر فيه هو عشمي في ربنا إنه يوصل صوتي لبنتي لأني كنت باكلمها واحنا تحت القطر".

وقالت ابنته "خديجة محمد "صاحبة الواقعة: "اترعبت خالص من اللي حصل، ودي كانت أول مرة أركب فيها القطر، وماحدش من اصحابي عرف؛ لأن صورتي ماكانتش على السوشيال ميديا، ولما طلعنا من تحت القطر الناس فضلوا يطبطبوا علينا، وكملنا طريقنا بعد كده وروّحنا لأهلنا".