طالبة في جامعة مصر المعلوماتية تكشف سبب تفضيلها دراسة الفنون الرقمية على دراسة الطب

كتب- محمد أبوالمجد:

وقالت شهد محمد الطالبة بكلية فنون رقمية بجامعة مصر المعلوماتية: "إن والدي كان يرغب في دخولي مجال الطب بعد الثانوية العامة خاصة إني كنت متفوقة إلى حد ما ولكني فضلت دخول جامعة مصر المعلومات ومجال الفنون الرقمية لأني طول عمري بحب الرسم وكنت شايفة إنه موهبة ولكن مش هشتغل فيها ولما لقيت حاجة عاملة مزج بين الرسم ديجيتال وتصميم الألعاب".

وأضافت "شهد" في حوارها لبرنامج "يحدث في مصر" على فضائية "إم بي سي مصر" اليوم الأربعاء، أن تصميم الألعاب معروف في العالم كله ولكن في مصر لا يعرفه أحد، موضحة: "بيتقال لي دا مجال جديد وصعب ايه يخليكي تجربي في نفسك لكني بجاوب إن لو كلنا بنفكر بنفس التفكير عمرنا ما هنتقدم، مش هنفضل طول عمرنا هنقول هنطلع كذا عشان أضمن لأن مش هيبقى في فرص شغل ولما يكون في حاجة جديدة طالعة من تحت ايد ناس متخصصة الدنيا هتطور وهيكون فيه فرص عمل أكثر والأمر هيبقى ميزة".

وتابعت: "سأتخصص في مجال تصميم الألعاب العام القادم، وندرس كيفية تصميم الألعاب من خلال الأكواد والتشفير وشكل وبيئة اللعبة والشخصيات فيها وكيفية تصميمها"، موضحة: "كليتي عبارة عن 4 سنوات بدلًا من 5 سنوات نظرًا لنظام الساعات المعتمدة، وحاليًا مفيش سوق لدراستي في مصر وعقبال ما نخلص دراسة ممكن يبقى في مجال لدراستي في مصر"، مؤكدة: "السنة الأولى في الكلية بتاعتي بتبقى عبارة عن تأسيس بنتعلم كل حاجة وأنا لقيت نفسي في الرسم وتحويلة لـ 3D ودمجه مع الألعاب وهو شيء عجبني بنسبة كبيرة".

وأكدت: "مبسوطة في الكلية جدًا لأني بشتغل كتير وبتكلف بحاجات كتير ولو كنت داخلة المجال وأنا مش حاباه مكنتش هكمل فيه بالرغم من عدد الساعات الكتير والمضغوطة".